زەری نەوزاد

ئەڤرۆ ١٦ی تەباخێ یەك ژ گرنگترین ڕۆژێن دیرۆکی یێن نەتەوا کوردە کو پارتی دیموکراتی کوردستان هاتیە دامەزراندن، ئەڤ ڕۆژە ب تنێ دامەزراندنا حزبەکێ نینە، بەڵکو ڕۆژا دەستپێکرنا بزاڤەکا دیروکی یە کو گوهۆرینێن مەزن ل چارەنڤیسێ گەلێ کورد دروست کرن، رێبازەكە ل دەستپێكا چەرخێ نۆزدێ دەست ب شۆرەشێن نەتەوەیی کریە ل سەر ئاستێ هەرچوار پارچێن کوردستانێ و رۆلەكێ هەرە گرنک د بهێزبوونا هەستێ نەتەوەیی یێ کوردان دا گێرایە.

ئەڤ پارتە د سەردەمەکی هاتیە دامەزراندن کو گەلێ کورد ل هەموو پشکێن کوردستانێ زۆرترین پێدڤی ب ڕێکخستن و یەکگرتنێ هەبوو، دامەزراندنا پارتی پێدڤییەکا دیروکی بوو بۆ درێژەدان ب خەبات و خۆڕاگرییا گەلێ کورد د وان قۆناخێن نەخۆش و دژوار دا کو دوژمن و داگیرکەرێن کوردستانێ ب هەمی هێز و شیانێن خۆ بزاڤا بێدەنگکرنا شۆڕەش و سەرهەڵدانێن گەلێ کورد ددا، ل وی دەمێ کوردستان د ناڤبەرا چەندین دەولەتان دابەش ببوو و هەر دەوڵەتەکی هەول ددا کوردان ل نەتەوە و کلتورا وان دویر بێخیت، لەوما گەلێ کورد پێدڤی ب ڕێکخستنەکا نەتەوەیی هەبوو کو دەنگێ وان بگەهینتە جیهانی.

گرنگترین كارێ پارتی دیموكراتی كوردستان د 79 سالێن بووری دا ئەو بوویە كو بەردەوام ئۆمێد و هیڤی و ژیان د دلێ هەر كوردەكی دا ب زیندی هێلایە، ڤێ پارتێ هەردەم رێكا رزگاریێ نیشا مللەتی دایە كو كوردان پاشەرۆژا گەش هەیە، ئەگەر پارتی دیموكراتی كوردستان نەبا، ئەڤرۆ رەنگە كورد وەك چەندین نەتەوێن دی یێن دەڤەرێ ژ ناڤچووبان، پارتی پرەكا پارێزەر بوویە بەرامبەر هەموو هەولێن ژ ناڤبرنێ، بێ گومان ئەگەرێ بهێزبوون و بەردەوامی و ماناڤەیا پارتی و تەمەن درێژییا وێ ڤەدگەریت بۆ هەلویستێن نەتەوەیی و نیشتیمانی یێن مەرجەع و رێبەرێ گەلێ كوردستانێ سەرۆك بارزانی، پارتی ب رێبەریا سەرۆك بارزانی ژێدەرێ هێزا كوردانە، دەمێ كو دوژمن هێرشی سەر كوردستانێ دكەن، ئەڤ پارتەیە یا هەردەم پێشەنگ ل بەرەڤانیكرنێ، بێی پارتی ئەڤرۆ كوردستان دا دەڤەرەكا نەناسكری بیت، ڤێ پارتێ ناڤێ كوردستانێ ب جیهانێ دا نیاسین و نیشادا كو ئەڤ ئاخە یا ب خودانە و روحا نەتەوەیەكێ یە. 

پارتی ب هێز و بەگراوەندەکێ شورەشگێری و پارتیزانییێ و ب باوەرییەك و فەرهەنگەکا تایبەت کو رێبازا بارزانە دروست بوو، و ب رۆندكێن دایکێن قەهرەمانان و ب خوینا شەهیدان بەرفرەھ بوو و بەردەوام بوو، ئەڤرۆ ژی ل خزمەتكرنێ حزبا ئێكێ یا جەماوەری یە ل سەر ئاستێ ئیراقێ، ب باوەرین رۆژ بۆ رۆژ پێگەهێ وێ یێ جەماوەری د زێدەبوونێ دایە و دێ هەر مینیت پارێزەرا ماف و داخوازیێن وەلاتیێن كوردستانێ و هەردەم بەرەڤانیكەرا راستەقینە یا پاراستنا ئەزموونا هەرێما كوردستانێ و دەستكەفتێن وێ بیت.

١٦ ی تەباخێ دوو جار دیرۆکەکا پیرۆزا مللەتێ کوردە، جارەکێ دامەزراندنا مەزنترین هێزا نەتەوەیی جارەکێ ژی ژ دایکبوونا رێبەرێ گەلەکێ مەزلۆمه‌.