ھەولێر-KDP.info- بە ئامادەبوونی ساسان عەونی، وەزیری شارەوانی و گەشتوگوزار و ئومێد خۆشناو، پارێزگاری ھەولێر لە شاری ھەولێر پارکی یەکتربڕی ١٢٠ مەتری کرایەوە، وەزیری شارەوانیش ئاماژە بەوە دەکات، زیاتر لە ١٠ ھەزار دار و ٢٢ ھەزار گوڵی تێدایە.
ساسان عەونی، وەزیری شارەوانی و گەشتوگوزاری ھەرێمی کوردستان، ئەمڕۆ یەکشەممە، ٣ـی ئابی ٢٠٢٥، لە کۆنگرەیەکی ڕۆژنامەوانیدا ڕایگەیاند: کردنەوەی ئەم پارکە لەسەر فەرمانی مەسروور بارزانی سەرۆکی حکوومەتی ھەرێمی کوردستان بووە، ھەروەھا لەلایەن نووسینگەی سەرۆکی حکوومەتەوە بوودجەی بۆ تەرخانکراوە، ئەم پارکە لەسەر ڕووبەری ٢٠٥ ھەزار مەتر چوارگۆشە دروستکراوە، لە یەکتربڕی شەقامی ھەولێر- موسڵ، لەگەڵ شەقامی ١٢٠ مەتری.
وەزیری شارەوانی گەشتوگوزار گوتیشی: لە نێو ئەم پارکەدا، زیاتر لە ١٠ ھەزار دار و ٢٢ ھەزار گوڵی تێدایە، لەگەڵ دوو بیری ئاو و دوو عەمباری تێدایە و ھەروەھا ئاڵای کوردستان بە بەرزی ئاڵا ٥٠ مەتر، ڕووبەری ٤ ھەزار و ١٢ مەترە بۆ یەکەمجارە بەمشێوەیە دیزاین بکرێت، ئەمە جگە لەوەی جوانییەکەی بێ وێنە بە شوێنەکە دەبەخشێت، بەتایبەتی بۆ ئەو کەسانەی لە مووسڵەوە دێنە ھەولێر و ھەروەھا ئەوانەی بە فڕۆکە گەشت دەکەن و بەجدی کار لەسەر ئەوە دەکەین ڕێژەیی سەوزایی لە سەرجەم شارەکان زیاد بکەین، بەتایبەتی لە پایتەختی ھەرێمی کوردستان.
جگە لەم پارکە بڕیار وایە پشتێنەی سەوزایی لە دەورووبەری ھەولێر دروستبکرێت و ئەمساڵیش چەند پارکێکی دیکە بکرێنەوە.
