ھەولێر-KDP.info- سەرۆکی ھەرێمی کوردستان لە ساڵیادی جێنۆسایدی بارزانییەکاندا پەیامێکی بڵاو کردەوە و ڕایگەیاند: دەستی ئەو دایکە دڵسۆزانە ماچ دەکەم کە بە خۆشەویستی و دڵسۆزی بۆ گەل و نیشتمان، منداڵەکانیان پەروەردە و گەورە کرد.
دەقی پەیامەکەی سەرۆکی ھەرێمی کوردستان:
ئەمڕۆ چل و دوو ساڵ بەسەر تاوانی سامناکی ئەنفالکردنی ھەشت ھەزار ھاووڵاتیی سڤیلی بێتاوانی بارزانیدا تێدەپەڕێت. لەم یادە خەمگینەدا، سەرمان لەبەردەم گیانی پاکیاندا دادەنوێنین و بەوپەڕی ڕێز و وەفادارییەوە بەبیریان دەھێنینەوە.
ئەنفالکردنی بارزانییان لەلایەن ڕژێمی ئەوسای عێراقەوە، بەردەوامیی زنجیرەیەک تاوان بوو بۆ شکاندنی ئیرادەی گەلی کوردستان و قڕکردنی، بەڵام لەبەردەم خۆڕاگری و کۆڵنەدانی کوردستانییاندا شکستی ھێنا و بووە پەڵەیەکی ڕەش بە نێوچەوانی ئەنجامدەرانییەوە.
دایکان، خوشکان، ھاوسەران و خێزانە بارزانییەکان دوای ئەو کارەساتە، دەردەسەری و نەھامەتییەکی بێھاوتا ژیان، ناچار بوون بەرگەی نەبوونی و ھەژاری و ژیانێکی سەخت و دژوار بگرن. دەستی ئەو دایکە دڵسۆزانە ماچ دەکەم کە بە خۆشەویستی و دڵسۆزی بۆ گەل و نیشتمان، منداڵەکانیان پەروەردە و گەورە کرد.
لەم یادەدا جەخت لە مافەکانی تەواوی قوربانییانی ئەنفالی بارزانییان و شاڵاوەکانی ئەنفال و ھەموو قوربانییانی ڕژێمی پێشوو دەکەینەوە. ئەرکی حکوومەتی عێراقە کە ھەرچی پێویستە بیکات بۆ بەدیھاتنی دادپەروەری و قەرەبووکردنەوەی کەسوکاری قوربانییان.
با ڕابردوو و ئازار و تاڵییەکانی ببنە پەند و وانە و ھاندەر تا ھەموو پێکھاتەکانی عێراق پێکەوە بە یەکترقبووڵکردن و ڕێزلەیەکگرتن و لێبوردەیی، ئاشتییانە و شکۆمەندانە بە ئازادی و سەرفرازی بژین و بێ جیاوازی وڵات کۆکەرەوەی ھەمووان بێت.
سڵاو لە یادی ئەنفالکراوانی بارزانی و تەواوی شەھیدانی کوردستان، ڕێز و پێزانین بۆ ھەموو ئەو جوامێرانەی لە ھەولێر و ناوچەکانی، بەھانای بارزانییە لێقەوماوەکانەوە چوون و یارمەتییان دان.
نێچیرڤان بارزانی
سەرۆکی ھەرێمی کوردستان
٢٠٢٥/٧/٣١