زەری نەوزاد
گەلەك فاكتەر یێن هەین كو جیهان رۆژ بۆ رۆژێ یێ بەرەڤ تێهنێبوونێ ڤە دچیت، وەكو زێدەبوونا ژمارا ئاكنجیبوونان و گوهۆرینێن سەقایی. ئیراق و ههرێما كوردستانێ بەهرا پتر یا ژێدەرێن وێ یێن ئاڤێ ل ژێر كونترۆلا وەلاتێن جیران دایە، ئهڤه ژى دبیته ئهگهر كو دگهل دهربازبوونا دهمى ئەردێ ئیراقێ زێدهتر بەرەڤ بیابانیبوونێ ڤە بچیت و مهترسیێن مهزن ل پاش خۆ بهێلیت.
ل دویڤ وان ڤەكۆلین و پێشبینیێن سەبارەت پاشەرۆژا ئاڤێ هاتینە كرن، چەرخێ نوكە دێ چەرخێ قەیرانا ئاڤێ بیت و ل 30 سالێن بهێت كارتێكرنا كێم ئاڤیێ ب رەنگەكێ بەرچاڤ دێ دیار بیت و ل رۆژهەلاتا ناڤەراست پرانیا كێشە و ململانێ دێ ل سەر قەیرانێن ئاڤێ بن، لەوما پێدڤیە بابەتێ ئاسایشا ئاڤا هەرێما كوردستانێ د پلانێن پێشیێ بن یێن ستراتیژی یێن هەرێمێ داكو ئاسایشا ئاڤا هەرێما كوردستانێ هەردەم یا پاراستی بیت.
ئێك ژ وان باژێرێن هەرێما كوردستانێ كو كێشا كێم ئاڤیێ هەی، باژێرێ هەولێرێ بوو، كو چارەسەریا وێ ببوو خەون، ب تایبەت د وەرزێ هاڤینان دا، ئەو كێشەیە ب رەنگەكێ بەرچاڤ پەیدا دبوو و كارتێكرن ل سەر ژیانا وەلاتیان دكر و گەلەك تاخ د مانە بێ ئاڤ و ب تانكەران ئاڤ بۆ دهاتە دابینكرن.
مەسرور بارزانی سەرۆك وەزیرێن هەرێما كوردستانێ پشتی دەستبكاربوونا كابینا نەهێ، گەلەك پرۆژێن ستراتیژی ئەنجامدان، ئێك ژ وان پرسا چارەكرنا كێشا ئاڤا هەولێرێ یە، بەری سالەكێ دەست ب پرۆژێ فریاگوزارییا بلەز یا ئاڤا هەولێرێ ب كوژمێ 480 ملیون دۆلاران هاتە كرن و نوكە قۆناغا ئێكێ یا ئاڤا ڤی پرۆژەی گەهشتیە هەولێرێ، هەولێر ژ كێشا پێنجی سالیا كێم ئاڤیێ دێ رزگار كەت و ئێكەم هاڤینا بێ ئاڤ دێ دەرباز كەت، كو سەرەرای چارەكرنا كێمیا ئاڤێ ب سەدان بیرێن ئاڤێ دێ هێنە گرتن كو ب ڤێ چەندێ ژی دێ پارێزگاری ل سامانێ ژێر ئەرد یێ ئاڤێ هێتە كرن، هەروەسا ئەڤ پرۆژە دێ بیتە ئەگەر كو پتر پرۆژێن كەسكاتیێ بهێنە ئەنجامدان و ئاڤ بۆ بهێتە دابینكرن.
كابینا نەهێ ل گەل دەستبكاربوونا خوە، بەردەوام ل سەر بەرنامەكێ روون و سیستەماتیك كار دكر، بەردەوام بۆ وێ ئارمانجێ كار كریە كو خزمەتگوزاریێن دەستپێكێ یێن ژیانێ بگەهینتە وەلاتیان وەكو ئاڤ، كارەب و رێك و پر، د كابینا نەهێ دا، 23 بەنداڤ هاتینە تمامكرن و 11 بەنداڤ ژی د پرۆسا بجهـئینانێ دانە، بەنداڤێن چەمرگە، خنس، دێوانە، تووڕەجار، ئاقووبان، شەوگێڕ ب دوماهی هاتینە، دوماهیا ئەڤ سالە ژی بەنداڤێن گۆمەسپان و بەستۆڕە دێ ب دوماهی هێن، ئەڤ بەنداڤە دێ رۆلەكێ گرنگ ل پاراستنا ئاڤا ژێر ئەردی گێرن و كەرتێ چاندنێ ڤەژاندنەكا بەرچاڤ بخۆڤە بینیت و زێدەتر خەلكێ گوندان دێ مفای ژ ڤێ ئاڤێ بینن.
ئەڤ ئاڤەدانیا هەرێما كوردستانێ ب خۆڤە گرتی، سەرەرای وێ یەكێ دهێت كو 11 سالە حكومەتا فیدرال بودجێ هەرێما كوردستانێ بری.