کەنعان خەیلانی
سەرۆکی بۆردی ئینستیتیوتی کلتووری کوردی ـ ئەمریکی
لە پێش و دوای پڕۆسەی ئازادی عێراق سەرکردایەتی سیاسی کوردستان پەیوەندیەکی باشی دیپلۆماسی لەگەڵ وڵاتە یەکگرتووەکانی ئەمەریکا هەبوو، هەر بۆیە سەرۆکی پێشووی ئەمەریکا جۆرج بۆش، کوردی بە متمانە پێکراوترین هاوپەیمانی ئەمەریکا ناساند لەو سەردەمهدا.
ئهمهش نەیارانی کوردی نیگەران کرد. ئەم هاوپەیمانیەتەیەش لە سەردەمی شەڕی داعش گەیشتە لوتکە، چونکە سەرۆک بارزانی و پێشمەرگەی کوردستان بە نوێنەرایەتی تەواوی دونیا ئەم شەڕەیان کرد و داعشیان تێکشکاند، ئەمەش بووە مایەی نیگەرانی هەموو نەیارانی کورد بۆیە زۆر بە وردی کاریان کرد بۆ لاوازکردنی پێگەی هەرێمی کوردستان بەتایبەت لەسەر و بەندی ڕاپرسی خەڵكی کوردستان، ئەوەبوو لە ئیدارەی پێشتری ئەمەریکا بە ئاشکرا و بەڕوونی پشتی حکوومەتی عێراقیان گرت بەرامبەر بە خەڵکی کوردستان.
بەتایبەت لە بابەتی نەوت و غاز، شێوازی پەیوەندی حکوومەتی هەرێم و حکوومەتی فیدڕاڵی، بەکارهێنانی دەسەڵاتەکانی دادگای فیدڕاڵی عێراق وەکو لایەنگیر نەک پەیڕەوکردنی داد، کە زۆر بە ڕوون و ئاشکرا بووە جێی لایەنێکی هەرێمی، حکوومەتی عێراقی دەجوڵاند دژ بە ههرێمی كوردستان، نەیارانی کورد بە جۆرێک کاریان دژ بە کورد دەکرد کە بۆ چەندین جار لە ڕاپۆرتەکانی وەزارەتی دەرەوەی ئەمەریکا ڕەخنەیان لە کورد دەگرت، بەڵام لە کابینەی نۆی حکوومەتی هەرێم و بەرێز مەسروور بارزانی زۆر بەوردی کاریان بۆ ڕاستکردنەوەی ئەم نا هاوسەنگی و ناعەدالەتیە کرد، ئەو پشیتیوانیەی ئەمڕۆ دەیبینین بەرهەمی ماندووبوون و هەوڵی بێوچانی سەرۆکی حکوومەتە، کە وەزیری دەرەوەی ئەمەریکا بە ڕاشکاوانە لە بەرامبەر کۆنگرێسی وڵاتەکەی جەخت لە پشتیوانی ئەمەریکا دەکاتەوە بۆ خەڵکی کوردستان.
کوردیش لە ناوچەكەدا وەکو تاکە هاوپەیمانی ئهریكا ماوەتەوە، ئەگەرچی لە زۆر وێستگەی سیاسی کورد زوڵمی لێکراوە بەڵام لە پرینسیپ دا لەگەڵ هاوپەیمانان یەکدەگرێتەوە ئەویش لە پڕۆسەی دیموکراسیدا.
مەسروور بارزانی وەک سەرۆکی حکوومەت بە واژۆکردنی ئەم گرێبەستە توانی چەند پەیام و دەستکەوتێک بۆ گەلی کوردستان مسۆگەر بکات.
١- ڕێگهخۆشکردن بۆ کۆمپانیا بیانیەکان بێن لە کوردستان وەبەرهێنان بکەن و بەرژەوەندی دوولایەنە لەنێوان خەڵکی کوردستان و ئەمەریکا دروست بکات، بۆ دروستکردنی پشتیوانی کورد.
٢- بەهێزکردنی کەرتی نەوت و غازی کوردستان و درووستکردنی پردی ئابووری لە نێوان ئەمەریکا و کوردستان، بۆ بەهێزکردنی ئابووری کوردستان.
٣- ناردنی پەیامی تەبایی و دۆستایەتی و هاوپەیمانی نێوان ئەمەریکا و کوردستان، کە دەمێکە کار بۆ تێکدانی ئەم پەیوەندیە دەکرێت بە مەبەستی لاوازکردنی پێگەی هەرێمی کوردستان.
٤- ڕاستکردنەوەی هەموو ئەو زانیارییە هەڵانەی لە ڕابردوو دراون بە ئەمەریکا و هاوپەیمانان.