ھەولێر-KDP.info- ٣٣ ساڵ لەمەوبەر، لە ڕۆژێکی وەکو ئەمڕۆدا یەکەم ھەڵبژاردنی پەرلەمانی کوردستان ئەنجامدرا. سەرۆکی پێشووی پەرلەمانی کوردستانیش دەڵێت، ھەڵبژاردن بیرۆکەی سەرۆک بارزانی بوو، بۆ ئەوەی گەل نوێنەری خۆی ھەڵبژێرێت و بڕیار لە چارەنووسی خۆی بدات، نەک حیزبەکان بۆ بەرژەوەندی خۆیان.
دکتۆر کەمال کەرکووکی، سەرۆکی پێشووی پەرلەمانی کوردستان، لە لێدوانێکی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند، پێش ٣٣ ساڵ لە ڕۆژێکی وەکو ئەمڕۆدا یەکەم ھەڵبژاردنی گەلی کوردستان ئەنجامدرا و بووە بنەمایەک بۆ دامەزراندنی پەرلەمان و پێکھێنانی حکوومەتی ھەرێمی کوردستان، ئەو یادە گرنگە لە کەسوکاری شەھیدان و ئەنفال و کیمیاباران و لە پێشمەرگە قارەمانەکان و لە پۆلیس و ھێزە ئەمنیەکان و گشت خەڵکی کوردستان پیرۆز بێت، بەتایبەت لە خاوەن بیرۆکەی ئەنجامدانی ھەڵبژاردن ڕێزدار سەرۆک بارزانی، کە لە گردبوونەوەیەک لە شاری کۆیە بۆ پێشوازی لە بەڕێزیان، لە وتارەکەیدا فەرمووی پێویستە گەل نوێنەری خۆی ھەڵبژێرێت و فەرمانڕەوایی خۆی بکات، نەک حیزبەکان بۆ بەرژەوەندی خۆیان.
سەرۆکی پێشووی پەرلەمانی کوردستان گوتیشی، ئەوکات سەرۆک بارزانی باسی لەوەکرد کە بەرژەوەندی گەل ئەوەیە نوێنەری خۆی ھەڵبژێرێت و پەرلەمانی خۆمان ھەبێت و متمانە بە حکوومەت بدات و، خزمەتی گەلی کوردستان بکەین نەک حیزبەکان، بۆیە بیرۆکەی سەرۆک بارزانی سەرکەوت و بووینە خاوەن پەرلەمان و حکوومەت و فیدراڵیەت، کە ئێستا لە دەستووری عێراق لە ماددەی (١١٧) جێگیر بووە،ئومێدەوارین بگەینە گشت مافە ڕەواکانی گەلەکەمان.
کەرکووکی دەیگێڕێتەوە و دەڵێ، ئەوکات لە لیژنەی باڵای ھەڵبژاردنی سنووری بادینان بووین و، بە سەر بنکەی دەنگدانەکاندا دەگەڕاین، ئەوەی زۆر سەرنجمی ڕاکێشا کچانی (١٧) حەڤدە ساڵ و (١٦) شانزە ساڵان بوو، کە لە پێش فەرمانگەی نفوس ڕیز بووبوون و، دەگریان کە لێیانمان پرس کێشەتان چییە؟ دەیانگوت ئێمە دەمانەوێت تەمەنمان گەورە بکەین بۆ ئەوەی بتوانین دەنگ بدەین، فەرمانگەی نفووسی دھۆک قبووڵ ناکەن!!! ئەوەی زانراوە ئافرەت ھەمیشە حەز دەکەن تەمەنیان بچووک نیشان بدەن کەچی ئەو ڕۆژە دەیانویست تەمەنیان زیاد بکەن، ئەوەش لەبەر ئارەزوویان و خۆشەویستییان بۆ بەشداربوون لە ھەڵبژاردندا.
دوای ڕاپەرینە شکۆدارەکەی ئاداری ساڵی ١٩٩١ سەرۆک بارزانی لە ڕۆژی ٢٢ی ئاداری ساڵی ١٩٩١ لە کەرنەڤاڵێکی بێ وێنەی جەماوەریدا لە کۆیە گوتارێکی پێشکەش کرد و گوتی، قۆناغی شەرعیەتی شۆڕشگێری کۆتایی ھات و پێویستە بەرەو شەرعیەتی یاسایی ھەنگاو بنێین و ھەڵبژاردن بکرێت و جەماوەری کوردستان و گەلی کوردستان بڕیار لە چارەنووسی خۆی بدات.
لە ڕۆژی ٢٨ی نیسانی ساڵی (١٩٩٢) لە لایەن بەرەی کوردستانی یاسای ژمارە (١)ی ساڵی (١٩٩٢) یاسای ھەڵبژاردنەکانی ئەنجومەنی نیشتیمانیی کوردستان - عێراق پەسەند کرا و بڕیاری ھەڵبژاردن درا، لە (١٩)ی ئایاری (١٩٩٢)دا بە بەشداریی نزیکەی یەک ملیۆن دەنگدەر یەکەم ھەڵبژاردن بە ھاوکاری و چاودێرانی بیانی ئەنجام درا.
بڵند ئیبراھیم