ھەولێر-KDP.info- لە پێشھاتێکی گرنگدا بۆ کەرتی وزەی ھەرێم، کۆمەڵەی پێشەسازی نەوتی کوردستان (ئەپیکۆر) چەند مەرجێکی دیاریکراوی خستەڕوو بۆ دەستپێکردنەوەی ھەناردەی نەوت لە ڕێگەی بۆری عێراق-تورکیاوە، کە دەکرێت ببێتە خاڵی وەرچەرخان لە دانوستانە بەردەوامەکانی نێوان ھەولێر و بەغدا.
مایلز کاگینز، گوتەبێژی ئەپیکۆر، لە لێدوانێکی تایبەتدا لەگەڵ ماڵپەڕی فەرمیی پارتی دیموکراتی کوردستان، جەختی کردەوە کە کۆمپانیا ئەندامەکان ئامادەن بۆ دەستپێکردنەوەی ھەناردە، بە مەرجی دابینکردنی سێ گەرەنتی سەرەکی لە لایەن عێراق: دڵنیابوون لە پێدانی پارەی ھەناردەی ڕابردوو و داھاتوو، میکانیزمی پێدانی ڕاستەوخۆی پارەکان، و پاراستنی مەرجە بازرگانی و ئابوورییەکان.
"کۆمپانیا ئەندامەکانمان ئامادەباشی تەواویان ھەیە بۆ کارکردن، دڵنیایی دارایی و بەردەوامی بازرگانی دەبێت ببنە بنەمای ھەر ڕێککەوتنێکی دەستپێکردنەوە." مایلز کاگینز وای وت.
لە ماوەی ساڵی ڕابردوودا، چەندین گفتوگۆ لە نێوان ھەولێر و بەغدا ئەنجام دراون بۆ دۆزینەوەی چارەسەرێک، دوا دانیشتنەکان لە نێوان وەزارەتی نەوتی عێراق و وەزارەتی سامانە سروشتییەکانی ھەرێم ئاماژەی ئەرێنییان تێدا بووە.
ئەم ڕاگەیاندنەی ئەپیکۆر، لە کاتێکدا دێت کە گرنگیدان بە کەرتی نەوتی کوردستان زیادی کردووە، کە لە داخستنی ھەناردەی نەوتی ھەرێم بۆ تورکیا وەستاوە. شارەزایانی پیشەسازی مەزەندە دەکەن کە دەستپێکردنەوەی ھەناردە دەتوانێت کاریگەری ھەبێت لەسەر داھات بۆ ھەرێم و عێراق و ھەروەھا لە ئاستی جیھانیشەوە پێشوازی لەم ھەنگاوە دەکرێت.
ئامادەیی ئەپیکۆر بۆ بەشداریکردن لە دانوستانی سێ قۆڵی لەگەڵ حکوومەتی فیدڕاڵی عێراق و حکوومەتی ھەرێمی کوردستان، نیشانەیەکی ئەرێنییە بۆ چارەسەرکردنی ئەم کێشەیە کە کاریگەری لەسەر ھەموو لایەک ھەیە.
کاروان باعەدری