هەولێر-KDP.info- فازڵ میرانى، بەرپرسى دەستەى کارگێڕى مەکتەبی سیاسی، لە بارەگاى مەکتەبی سیاسیی پارتى دیموکراتى کوردستان لە پیرمام، پێشوازى لە شاندێکى پارتى سۆسیالیستى کوردستان (پەسەکە) بە سەرۆکایەتیی (بایرام بوزیەل) سەرۆکى گشتیى پەسەکە و شاندى یاوەرى کرد.
لە دانیشتنێکدا، فازڵ میرانى، بەرپرسى دەستەى کارگێڕى مەکتەبی سیاسی، بە ناوى سەرکردایەتیى سیاسیى پارتییەوە، بەخێرهێنانى شاندى میوانى کرد و تیشکى خستە سەر ڕەوشى ئەمڕۆى کوردستان بە تایبەتى و عێراق و ناوچەکە بە گشتى و ڕەوشەکەى بە هەستیار وەسف کرد.
لە دانیشتنەکەدا، فازڵ میرانی دووپاتى کردەوە، کە لێکتێگەیشتن و ئاڵوگۆڕکردنى بیروڕا لەگەڵ یەکتر، دەبێتە هۆى زاڵبوون بەسەر کێشەکان و نەهێشتنى ناکۆکییەکان.
هەروەها میرانى پوختەیەکی لەسەر پرۆسەى هەڵبژاردنەکانى خولى شەشەمى پەرلەمانى کوردستان پێشکەش کرد و بە هەڵبژاردنێکى سەرکەوتووى لە قەڵەم دا، جەختیشی کردەوە، کە ئەم هەڵبژاردنە جێگاى شانازییە بۆ خەڵکى کوردستان لە سەرتاسەرى ناوچەکە و جیهاندا.
ڕاشیگەیاند، خەڵکى هەرێمى کوردستان بڕیارى خۆى دا و دەبێت ئێستا لایەنە براوەکان دەست بە پێکهێنانی حکوومەتى هەرێمى کوردستان بکەن.
سەبارەت بە ڕەوشى ناوچەکەش، فازڵ میرانى تەئکیدى کردەوە، کە ناوچەکە بە بارودۆخێکى نالەباردا تێدەپەڕێت و پێویستە هەموو لایەنەکان بە بەرپرسیاریەتی و ژیرانە هەڵسوکەوت لەگەڵ پێشهاتەکاندا بکەن بۆ پاراستنى ڕەوشى ناوچەکە و دووپاتیشی کردەوە، کە پارتى لەگەڵ چارەسەرکردنى کێشەى کوردە لە تورکیا بە شێوەى ئاشتیانە و دیموکراسى.
میرانی، پەیوەندییەکانی لە نێوان پارتى دیموکراتى کوردستان و پەسەکەدا بە مێژوویى و سەرکەوتوو وەسف کرد و هیواى خواست ئەم پەیوەندیانە بەرەو پێش بڕۆن و لە خزمەتى هەردوولادا بن.
لەلاى خۆیەوە، (بایرام بوزیەل) سەرۆکى گشتیى پەسەکە، بە ناوى خۆى و شاندەکەوە سوپاسى سەرکردایەتیى سیاسیى پارتیى کرد بۆ پێشوازیکردنیان و ڕەخساندنى ئەم دیدارە و پیرۆزبایى لە پارتى کرد بە بۆنەى سەرکەوتنى لە هەڵبژاردنەکانى پەرلەمانى کوردستان و تەئکیدی کردەوە، کە هەرێمى کوردستان ڕوویەکى شارستانیی پێشانى جیهان دا و ئەمە جێگاى دڵخۆشیى هەر کوردێکە لە هەر شوێنێکى جیهاندا بێت.
هەروەها (بایرام بوزیەل) دووپاتى کردەوە، کە (پەسەکە) لەگەڵ چارەسەرکردنى ئاشتیانەى کێشەى کوردە لە تورکیا و هەرچى پێویست بێت بۆ ئەم مەبەستە (پارتى سۆسیالیستى کوردستان - پەسەکە) ئامادەیە و درێغى ناکات. هیواشى خواست کوردستان هەر لە سەرکەوتن و پێشکەوتندا بێت.