ھەولێر-KDP.info- ئەمڕۆ پێنجشەممە، ٣١ـی ئۆکتۆبەری ٢٠٢٤، د. باساک بەرزنجی، سەرۆکی کۆنگرە و سەرۆکی سەندیکای پزیشکان، لە ١٠یەمین کۆنگرەی پزیشکی میزۆپۆتامیا ڕایگەیاند، ئامادەبوونی سەرۆک بارزانی ورەمان پێدەدات، کە بەردەوام بین و دەست لە ئاواتەکانمان ھەڵ نەگرین.
سەرۆکی کۆنگرەکە دەڵێت: "سوپاسی مەسروور بارزانی دەکەین کە ھەموو کات لەگەڵماندایە و ھاوکاریی و پاڵپشتی کردووین بۆ ئەم کۆنگرەیە".
د. باساک بەرزنجی دەشڵێت: "ئەمڕۆ پزیشکان لە تاراوگە و شارە جیاوازەکان لێرە کۆبوونەتەوە، کە زۆربەمان لە زۆر کۆنگرە و وڵاتانی جیاواز بەشدار بووین، بەڵام کۆنگرەی ئەمڕۆ جیاواز و تایبەتە".
باساک بەرزنجی باسی لەوەشکرد: "ئەمڕۆ ئێمە وەک پزیشکی کورد دڵمان خۆشە، دڵنیام سەرۆک بارزانیش لە ئێمە دڵخۆشترە، کە دەبینێت ھەموو پزیشکان لێرە کۆبوونەتەوە، تا لە ئاستی بەرزی زانستیی ئەوەی لە توانایاندایە پێشکەشی کوردستان و گەلەکەی بکەن".
ناوبراو ڕاشیگەیاند: "ئەمڕۆ ١٠یەمین کۆنگرەی پزیشکانی میزۆپۆتامیایە، یەکەمجارە لە ھەولێر ساز دەکرێت، مەبەست لەم کۆنگرانە ئەوەیە کە ئەو پزیشکانەی لە بابەتی خۆیان گەیشتوونەتە ئاستێکی بەرز، گۆڕینەوەی ڕای زانستیی پزیشکان و ھاوکارییی یەکتری لەگەڵ دانانی بناغەی زمانی کوردی لە بواری پزیشکیی، پێشکەش بکرێت".