نیوەڕۆی ئەمڕۆ چوارشەممە 7/12/2022 بەڕێز نێچیرڤان بارزانی، سەرۆكی هەرێمی كوردستان، پێشوازی لە بەڕێز تۆبیاس تونكێل بەرپرسی دۆسیەی ڕۆژهەڵاتی ناوەڕاست لە وەزارەتی دەرەوەی ئەڵمانیا و شاندێكی یاوەری كرد كە باڵیۆزی ئەڵمانیا لە بەغدا و كونسولی گشتییان لە هەرێمی كوردستان یاوەری بوون.
لە كۆبوونه‌وه‌یه‌كدا پەیوەندییەكانی ئەڵمانیا لەگەڵ عێراق و هەرێمی كوردستان، دۆخی ناوچەكە بەگشتی، پەیوەندییەكانی هەولێر ـ بەغدا، پەیوەندییەكانی عێراق و هەرێمی كوردستان لەگەڵ وڵاتانی دراوسێ، خرانەی بەر باس و گفتوگۆ.
سەرۆك نێچیرڤان بارزانی سوپاسی هاوكارییە سەربازی و مرۆیییەكانی ئەڵمانیاى بۆ هەرێمی كوردستان لە شەڕی دژی تیرۆردا كرد و پوختەیەكی دەربارەی دوا سەردانی بۆ بەغدا و دیدار و كۆبوونەوەكانی لەگەڵ بەرپرسانی باڵای عێراق خستە ڕوو.
بەڕێز تۆبیاس تونكێل باسی لە ئامانج و به‌رنامه‌ى سەردانەكەی بۆ هەرێمی كوردستان و ناوچەكە كرد و ویستی وڵاتەكەی لە بەردەوامیی هاوكارى و پشتگیرى بۆ عێراق و هەرێمی كوردستان و چارەسەركردنی كێشە هەڵواسراوەكانی هەولێر ـ بەغدا، نیشان دا.
دۆخی ئەمنیی ناوچەكە بە گشتی، دۆخی ئاوارە و پەنابەران و ڕەخساندنی زەمینە بەمەبەستی گەڕانەوەیان بۆ زێدی خۆیان و جێبەجێكردنی ڕێككەوتنی شەنگال، لایەنێكی دیكەی دیدارەكە بوو كه تیایدا جه‌خت له به‌رده‌وامیى یارمه‌تیى مرۆییى ئه‌ڵمانیا بۆ ئاواره و په‌نابه‌ران دووپات كرایه‌وه.