دهۆک -KDP.info- رێڤەبەرێ گشتی یێ وەبەرهێنانێ ل پارێزگەها دهۆکێ دیار کر کو د بەردەوامیا چێکرنا پرۆژێن نوی یێن وەبەرهێنانێ دا یێن کو ل سەردەمێ کابینا نەهێ یا حکومەتا هەرێما کوردستانێ دهێنە چێکرن ئەڤرۆ رۆژا چارشەمبی 7/12/2022 نەخۆشخانەکا پەنجەشێرێ ل دهۆکێ مۆلەتا وەبەرهێنانێ وەرگرت.
کوردو ئیحسان، رێڤەبەرێ گشتی یێ وەبەرهێنانێ ل پارێزگەها دهۆکێ بۆ ماڵپەرێ فەرمیێ پارتی دیموکراتی کوردستان دیار کر کو حکومەتا هەرێما کوردستانێ ب رێیا وەبەرهێنانێ پشتەڤانیێ ل وان پڕۆژەیان دکەت کو خزمەتا خەلکی ب هەموو شێوەیەکی دهێتەکرن، بۆ ڤێ مەرەمێ رێڤەبەریا گشتی یا وەبەرهێنانێ ل پارێزگەها دهۆکێ مۆلەتا وەبەرهێنانێ دایە پڕۆژەیەکێ وەبەرهێنانێ دکەرتێ ساخلەمیێ دا کو ژ نەخۆشخانەیەکا پەنجەشێرێ بناڤێ (نەخۆشخانا مان یا پەنجەشێرێ) کو دێ ژ (١٢) قاتان پێک دهێت و د دەمێ سێ ساڵان دا دێ ئەڤ پرۆژە ب دووماهی هێت و کەڤیتە د خزمەتا خەلکی دا.
ناڤهاتی ئاماژە دا وێ چەندێ کو شەش ملیون و 500 هزار دۆلار ژ لایێ وەبەرهێنەرەکی ڤە بۆ بجهئینانا ڤی پرۆژەی هاتینە تەرخانکرن و گۆت: "پڕۆژێ ناڤهاتی دێ ل سەر رووبەرێ ٣٠٢٠.٦٧م٢ ل تاخێ شندوخایا رۆژهەلات هێتە ئاڤاکرن".
رێڤەبەرێ گشتی یێ وەبەرهێنانێ ل پارێزگەها دهۆکێ خویا کر کو ئەڤ نەخۆشخانە ژ ئاڤاهیەکێ 12 قاتی پێکدهێت کو هەشت قات ل سەر ئەردن و چار قات ژی ل بن ئەردن و گۆت: "ئەڤە نەخۆشخانە یا دووێ یا پەنجەشێرێ یە ل پارێزگەها دهۆکێ مۆلەتا وەبەرهێنانێ وەردگریت".
رێوار محەمەد رەشید