عبدالعزیز محسن بارزانی
من دڤێت بێژم باش ھزرا خو د ڤان ھەردوو ھەلکەفتان دا بکەن، ئەوژی سیھو حەفت سالیا جینوسایدا بارزانیان و جەژنا قوربانی، دیسان شەش سالیا جینوسایدا شنگالیان و جەژنا چلێ ھاڤینێ واتە قەدەرا مە کوردان ئەڤەیە و ئەڤە بوویە و دێ ئەڤە بیت، لێ گونەھا مەیا مەزن ئەوە کو ئەم کوردو کوردستانی نە، لێ ھەتا ئێک کورد بتنێ ژی مابیت دێ کوردستان ھەر یا پاراستی بیت و ھەر دێ بیتە دەولەت.
بەری شەش سالان د سالا «٢٠١٤» دا گروپەکێ تیروریستی بناڤێ داعش گەلەک بێ وژدانانە ھێرش کرنە سەر دەڤەرا شنگالێ و جینوساید دژی وی خەلکێ بێ گونەھ ئەنجامدان، کو دژی ھەمو بنەمایێن مافێن مروڤی بوویە.
لێ خوراگریا شنگالیان و قارەمانیا پێشمەرگە و شەھیدبونا «٥٠٠» پێشمەرگەی بتنێ لسەر ئازادکرنا شنگالێ تیروریستێن داعش ژناڤبرن و سەرئەنجام روو رەش و شەرمەزارکرن. و ئیرادا گەلێ کوردستانێ ب سەرکەفت.
لێ دڤێت رۆلێ سەرۆک بارزانێ د روو ب رووبونا داعش دا و رزگارکرنا شنگالێ دا و ئەو سوزێن داینە بابە شێخ و سۆزێن خو بجێیناین چجاران نەھێنە ژ بیرکرن و ببنە فلمێن دیکیومێنتاری و سینەمایی داکو ھندی مرۆڤایەتی ھەیە ببینن و بزانن.
لێ ب مخابنی ڤە ژ ئەنجامێ وێ جینوسایدێ «٦٤١٧» کەس کەفتنە د دەستێن داعش دا و ب ھەولێن رێزدار نێچیرڤان بارزانی شیایە ھەتا نوکە «٣٥٣٠» کەس رزگار بکەن و ب ملیونان دولاران لێ ب مەزێخن.
بەلێ ھێشتا «٢٨٨٦» کەس ماینە بێ سەرشوینن و دبێژن بارا پتری د ناڤ کەمپا ھولێ دانە ل رۆژئاڤایێ کوردستانێ ل بن حوکمێ پەکەکێ.
دیسان دگەل ڤێ جینوسایدا چەرخێ «٢١» ێ «٣٦٠٠٠٠» ھزار کەس ئاوارەبوون و «١٠٠٠٠٠» ھزار کەس پەنابەری وەلایێن بیانی بون و دیسان «٦٨» مەزارگەھ ھاتنە پەقاندن و «٨٠» گورێن ب کوم ھاتنە دیتن و «١٢٩٣» کەس ل سەر دەستێ داعش ھاتنە شەھیدکرن و «١٧٥٩» زارۆک مانە بێ باب و «٤٠٧» زارۆک مانە بێ دایک و «٣٥٩» زارۆک مانە بێ دایک و باب.
ھەژی گوتنێ یە کو ھەموو خەلکێ شنگالێ «٥٥٠٠٠٠» ھزار کەس بووینە ئەوێن ئاوارەی ھەرێما کوردستانێ بووین پشتی خەلکی دەرگەھێن مالێن خو بۆ ڤەکرین و نانێ خو دگەل ب نیڤیکرین و دەرگەھێن مزگەفت و قوتابخانان بۆ ھاتینە ڤەکرن ب سەر «١٤» کەمپان دا ھاتنە بەلاڤکرن، نھا ھێدی ھێدی رۆژانە ھندەک د زڤرنەڤە شنگالێ.
باوەریەکا مەزن ھەیە دوور یان نێزیک دێ شنگال بیتە پارێزگەھەک ب سەر ھەرێما کوردستانێ ڤە و دێ باشترین خزمەتگوزاری بۆ ھێنە پێشکەشکرن.
ل داویێ مە دڤێت ببێژین جینۆسایدا شنگالێ زنجیرە جینۆسایدەک بویە ب سەر گەلێ کوردستانێ ھاتی ھەر ل جینۆسایدا فەیلیان و بارزانیان و گەرمیان و سورداش و قەرەداغ و بادینان و کیمیابارانکرنا ھەلەبجە و خرابکرنا «٤٥٠٠» گوندێن کوردستانێ و تاکو گەھشتیە جینۆسایدا شنگالێ ئێک ل دوڤ ئێک ھاتینەکرن ب گونەھا ھندێ کو کوردو کوردستانی بوینە.
بەلێ ئیرادا گەلێ کوردستانێ چجاران نامریت و ھەر دێ سەرکەڤیت.
سەرێ خو بۆ ھەموو شەھیدێن رێکا ئازادیێ د چەمینین، سەروەرێ وان بارزانیێ نەمرو ئیدریسێ ھەردەم زیندی و روو رەشی بۆ دۆژمنێن گەلێ کوردستانێ.
کوردستان ھەر دێ سەرکەڤیت.