Kurdî  ■  كوردی  ■  عربي
SUN, 8 DEC 2019 12:59 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

شەمۆ: ئاگره‌كه‌ی شنگال دەستێكی سیاسیی لە پشته.. دوو گەنج گیانیان لە دەست داوە ‌
| KDP.info


شنگال-KDP.info- نوێنەری شنگال لە ئەنجوومەنی پارێزگای مووسڵ دەڵێ، لە سنووری شنگال ئاگرێكی زۆر لە گەنمی جووتیاران بەردراوە و بەو ھۆیەوە نزیكەی ھەزار دۆنم سووتاوە و دوو گەنجیش گیانیان لە دەست داوە.

بەرەكات شەمۆ، نوێنەری شنگال لە ئەنجوومەنی پارێزگای مووسڵ، بە ماڵپەڕی فەرمیی پارتی دیموكراتی كوردستانی ڕاگەیاند، شەوی ڕابردوو بە دەستێكی نادیار، ئاگرێكی گەورە لە سنووری شنگال، هەتا سۆراخ و سنوونێ بەردراوە، هەر بەو ھۆیەشەوە نزیكەی ھەزار دۆنم گەنمی جووتیاران سووتاوە، ئەوەیش ده‌ڵێ كە دوو گەنج سووتان و گیانیان لە دەست داوە.

ناوبراو ئاماژەیشی بەوە دا، كە ئەوان لە ئێستادا سەرقاڵی بردنی تەرمەكانیانن بۆ فەرمانگەی پزیشكی دادوەریی دهۆك، ئەوەش لە كاتێكدایە، كە بۆ سێ كاتژمێر ئاگرەكە بەردەوام بووە و هیچ ئامێرێكی ئاگركوژێنەوەش بەردەست نەبووە، بۆیە لە دوای گەیشتنی ئاگر بۆ ناو ماڵەكانی گوندی بۆرەك، دوو هاووڵاتی بە ناوەكانی بارزان عومەر گەبۆ و سەعید شیخ سەبری، نەیانتوانی خۆیان لە ئاگر رزگار بكەن و گیانیان لە دەست دا.

بەرەكات شەمۆ لای روون نییە، كە كێ ئاگرەكەی كردووەتەوە، بەڵام گومانیشی لەوە نییە، كە دەستێكی سیاسیی لە پشت بێ، وەكخۆی گوتی، لێكۆڵینەوەش لە رووداوەكە دەستی پێكردووە.

جەختیش لە بێتوانایی ئەو هێزانە دەكاتەوە، كە لە شنگالدان، بەو پێیەی ناتوانن شارەكە بپارێزن، ناوچەكەش بە بێ خاوەن ناو دەبات، كە حكوومەتی عێراق هیچ خەمێكی لێ ناخوات.

ئەوەش لە كاتێكدایە، كە بەڕێوەبەرایەتیی گشتیی بەرگریی شارستانیی عێراق، لە بەیاننامەیەكدا رایگەیاند، ژمارەی رووداوەكانی ئاگركەوتنەوەكان لە دەغڵودانی جووتیاران، گەیشتووە‌تە ٢٧٢ ئاگركەوتنەوە.

لە بەیاننامەكەشیاندا ئاماژەیان بەوە كردووە، كە لە رێككەوتی 8/5/2019 دەغڵودانی جووتیاران و گەنم و جۆ و پوش و پاوان و رەز و باخی هاووڵاتیان لە چەند پارێزگایەكی عێراق سووتاوە، كە ژمارەیەكیان بە ئەنقەست سووتێندراون.

بەرگریی شارستانی، تیشك دەخاتە سەر هۆكارەكان و بەمجۆرە پۆڵێنی كردوون‌، كە ٣٥ حاڵەتیان بە ئەنقەست بووە، هاوكات ٧٤ حاڵەتیش بە هۆی كێبڵ و وایەری كارەباوە بووە، ٢٥ حاڵەت بە هۆی پریشكی ئاگری دەڕاسە بووە، هەروەها ٢٢ حاڵەت بە هۆی فڕێدانی پاشماوەی جگەرە بووە و، ٣٢ حاڵەت سەرچاوەی دەرەكی بووە و ٨٤ حاڵەتیش هێشتا لەلایەن بەڵگەی تاوان دیاری نەكراون، كە‌ هۆكارەكانی چی بوون.

لە بەیاننامەكەشیاندا هاتووە، كە ئەو رووبەرەی لە ماوەی ٥ی٨ تا كاتی دەرچوونی بەیاننامەكە‌ سووتاوە، زیاتر لە ٤٠ هەزار دۆنم دەبێت.

ئەوەش‌ لە كاتێكدایە، زۆرترین رووبەری دەغڵودانی جووتیارانی كورد لە ناوچە كوردستانییەكانی دەرەوەی ئیدارەی هەرێمی كوردستان سووتیندراون و جووتیارانی كورد پییانوایە عەرەبی هاوردە و شۆڤێنی و توندڕەوەكان بە ئەنقەست، گەنم و جۆ و دانەوێڵە و رەز و باخەكانیان دەسووتێنن، بۆ ئەوەی خاكی باب و باپیرانیان چۆڵ بكەن.

 

خێڵان بەختیار_ بڵند ئیبراھیم




دوایین هەواڵەکان

"ئەوانەی رووبەری خانووی زێدەڕۆیان كەمە، بە سوودمەند ھەژمار ناكرێن"

SUNDAY, 08 DECEMBER 2019 12:12:24

هەولێر-KDP.info- هەفتەی رابردوو و دوای گه‌ڕاندنه‌وه‌ى لەلایەن سەرۆكی ھەرێمی كوردستانەوە، پەرلەمانی كوردستان جارێكی دیكە یاسای تاپۆكردنی خانووی زێدەڕۆی پەسەند كرد، ئەندامێكی لیژنەی شارەوانییەكانیش دەڵێ، لە كاتی تاپۆكردنی خانووی زێدەڕۆدا، ئەگەر رووبەرەكەی زۆر زیاد نەبێت، خاوەنەكەی بە سوودمەند ھەژمار ناكرێت.

 
عەلی خەلیل بۆ KDP: داعش لەناو مووسڵ سەرقاڵی خۆڕێكخستنەوەیە

SUNDAY, 08 DECEMBER 2019 11:12:52

مووسڵ-KDP.info- دوای ئەوەی لە سنووری خانەقین و كەركووك داعش دەستی بە جموجۆڵ و كردەوەی تیرۆریستی كرد، ئێستا بە شێوەیەكی بەرچاو سەری هەڵداوەتەوە و جووڵەیان زیادی كردووە، بەرپرسی لقی 14ی پارتیش دەڵێ، لە مووسڵیش بە هەمان شێوە داعش سەرقاڵی خۆڕێكخستنەوەیە. دەشڵێ: "خەڵك داوا دەكەن پێشمەرگە بگەڕێتەوە ناوچەكە".

 
حزبەكان پشتیوانیی خۆیان بۆ سەرۆكی حكوومەت دووپات دەكەنەوە

SUNDAY, 08 DECEMBER 2019 10:12:51

سلێمانی-KDP.info- سەرۆكی حكوومەتی هەرێمی كوردستان، لە گوتارێكیدا بە بۆنەی 100 ڕۆژی كاركردنی حكوومەتی هەرێم، رایگەیاند: "حكوومەتی هەرێم هی هەموو هاووڵاتیانە، بە تەنیا هی تاكەكەسێك و یان چەند حیزبێك نییە، بۆیە چاوەڕوانین هەموو لایەنە سیاسییەكانی هەرێم لە بەهێزكردنی ئەم حكوومەتەدا پاڵپشتمان بن". حزبە سیاسییەكانی كوردستانیش، پشتیوانیی خۆیان بۆ سەرۆكی حكوومەت دووپات دەكەنەوە.

 
وەزارەتی بازرگانی: رۆژ بە رۆژ جووڵەی بازرگانی لە هەرێم لە زیادبووندایە

SUNDAY, 08 DECEMBER 2019 10:12:19

هەولێر-KDP.info- گوتەبێژی وەزارەتی بازرگانیی حكوومەتی هەرێمی كوردستان گوتی، بە هۆی بوونی سەقامگیرییەوە لە هەرێمی كوردستان، رۆژ بە رۆژ جووڵەی بازرگانی لە زیادبووندایە و دۆخی بازرگانیش وەكو پێش هاتنی قەیرانی دارایی، ئاسایی بووەتەوە.

 
سەرۆك بارزانی سەرەخۆشی لە ئامیناخانی هاوسەری شەهید محیەدین ڕەحیم دەكات

SATURDAY, 07 DECEMBER 2019 21:12:22

ئێوارەی ڕۆژی شەممە 7ـی 12ـی 2019 سەرۆك مەسعود بارزانی لە ڕێگەی تەلەفۆنەوە پرسە و سەرەخۆشیی خۆی ئاراستەی ئامیناخانی هاوسەری شەهیدی سەركردە محیەدین ڕەحیم كرد بە هۆی گیانلەدەستدانی كوڕەكەی "ئاڵان محیەدین ڕەحیم" لە ڕووداوێكی دڵتەزێن لە وڵاتی ئەمەریكا.



 
© 2018 Kurdistan Democratic Party, KDP