هەولێر-KDP.info-  سەرۆکی پەرلەمانی کوردستان دەڵێت "کەرکووک شارێکی کوردستانییە، بەڵام تایبەتمەندیی خۆی هەیە و، پێکهاتە و نەتەوەی تری جگە لە کوردی تێدایە، هیوادارین کەرکووکییەکان پارێزگاریی لەو هەمەڕەنگییەی دانیشتوان و پێکهاتەکانی بکەن."

سەرۆکی پەرلەمانی کوردستان(د.یووسف محەممەد سادق) نیوەڕۆی ئەمڕۆ سیشەممە، لە پێشوازیی شاندێکی فراکسیۆنی تورکمان لە ئەنجوومەنی پارێزگای کەرکووکدا کردن.
شاندەکەی تورکمانەکان لەو کۆبوونەوەدەدا باسیان لە کێشە و گیروگرفتی تورکمانەکانی کەرکووک، بەتایبەتیش گیروگرفتی کارگێڕیی و دابەشکردنی پۆستەکانی ئەو شارە کرد. ئاماژەشیان داوە کە تورکمان و کورد دوو نەتەوەی ڕەسەنی ناوچەکەن و دەیان خاڵی هاوبەش کۆیان دەکاتەوە.

بەپێی هەواڵی سەرۆکایەتیی پەرلەمان کە بۆ ماڵپەڕی فەرمیی پارتیی دیموکراتی کوردستان نێردراوە، سەرۆکی پەرلەمانیش پێی ڕاگەیاندوون "لەئێستادا کە سەرقاڵی ئامادەکردنی دەستووری کوردستانین، کەرکووک و ناوچە دابڕاوەکانی تر وەک بەشێکی سەرەکیی هەرێمی کوردستان ئاماژەی پێکراوە، بەڵام تایبەتمەندیی ئەو ناوچانەش لەبەرچاو دەگرین، هیچ بڕیارێک بەسەر کەرکووکدا ناسەپێنین، چونکە بەدەر لە کورد لەو ناوچانە نەتەوەو پێکهاتەی تریش هەیە، لەکاتی گەڕانەوەی ئەو ناوچانە بۆ سەر هەرێمی کوردستان هەموو مافێکی ئەو پێکهاتانە لە دەستووردا بە یاسا دەپارێزین."
سەرۆکی پەرلەمان گوتیشی "ئێستا پێشمەرگە لە کەرکووک پارێزگاریی لە هەمو پێکهاتەکان دەکات بە بێ جیاوازی، ئەگەر پێشمەرگە نەبوایە، تیرۆریستان لافاوی خوێنیان لەو ناوچانە درووست دەکرد، بۆیە دەبێت هەمو نەتەوەکان ئەم ئازایەتییەی پێشمەرگە لەبەرچاو بگرن."