سەرۆکایەتیی هەرێمی کوردستان له روونکردنەوەیەکدا رەخنەی له هەندێ لایەنی سیاسیی رۆژئاوای کوردستان گرت و جەختی کردەوه که رێگه نادات پشتیوانیی سەرۆکایەتیی هەرێمی کوردستان وەک پردێک بۆ تاکڕەوی بەکار بهێندرێت ، ئەمەش دەقی روونکردنەوەکەیه:-
خۆشبەختانە هەتا ئێستا و لەدوای هەوڵێكی زۆری بەڕێز سەرۆكی هەرێمی كوردستان بارودۆخی ناوچە كوردییەكان بە بەراورد لەگەڵ بەشەكانی دیكەی سووریا زۆر ئارام بووە. هەر لە سەرەتای قەیرانەكەی سووریا لەڕێگەی بەڕێز سەرۆكی هەرێم و لایەنە ڕەسمییەكانی هەرێمی كوردستان هەوڵدرا هەموو لایەنە كوردییەكان لەژێر یەك چەتر بن و لەگەڵ یەكتردا هاودەنگ بن.
ئەوە بوو دوای كۆبوونەوە و ڕاوێژێكی زۆری سەرۆكی هەرێم و هەموو لایەنەكان لە 11ـی 7ـی 2012ـدا دەستەی باڵای كوردی ڕاگەیێندرا و بووە جێگەی خۆشحاڵیی گشت لایەنە كوردییەكان و پشتگیریی تەواوی بەڕێز سەرۆكی هەرێم و دامودەستگەكانی هەرێمی وەدەستهێنا و بووە دەستكەوتێكی نەتەوەیی بۆ هەموو لایەكمان.
لەو كاتەوە و هەتا ئێستایش جەنابی سەرۆكی هەرێم بە یەك چاو و وەك برا سەیری هەموو لایەنە كوردییەكانی كردووە. بەڵام بەداخەوە لایەنێكی دیاریكراو ڕۆژ لە دوای ڕۆژ بە سەفەقاتی گوماناوی خۆی پڕچەككردووە. ڕۆژ لە دوای ڕۆژ خۆی لە ڕێككەوتننامەی هەولێر دوور خستووەتەوە و لایەنەكانی دیكەی پەراوێز كردووە، هەتا كار گەییشتە كوشتن و گرتن و ڕفاندنی خەڵك و ڕەچاونەكردنی بۆچوونی لایەنە سیاسییە كوردییەكان.
لێرەدا ڕایدەگەیێنین هەتا هەڵبژاردنێكی ئازاد ئەنجام نەدرێت هیچ لایەنێك بۆی نیە تاكلایەنە خۆی فەرز بكات. هەتا كاتی هەڵبژاردن تەنیا دەستەی باڵا نوێنەرایەتیی خەڵك دەكات. ئێمە ڕێگە نادەین پشتیوانیی ئێمە وەك پردێك بەكار بهێنێت بۆ خۆسەپاندن و تاكڕەوی. بۆیە ناچارین پێداچوونەوە لە هەڵوێستی خۆماندا بكەین و، ئەگەر ڕێككەوتننامەی هەولێر بە تەواوەتی جێبەجێ نەكرێت و پێیەوە پابەند نەبن ئێمەش بڕیاری دیكە دەدەین.
سەرچاوەیەكی ڕۆژنامەوانی
لە سەرۆكایەتیی هەرێمی كوردستان