ھەولێر-KDP.info- مەکتەبی سیاسیی پارتی دیموکراتی کوردستان بە بۆنەی یادی ٦٥ ساڵەی هەڵگیرسانی شۆڕشی مەزنی ئەیلوولەوە، پەیامێکی پیرۆزبایی ئاراستەی گەلی کوردستان و پێشمەرگە قارەمانەکان دەکات و تێیدا جەخت لەسەر پاراستنی قەوارەی دەستووریی هەرێم و بەردەوامبوون لەسەر ڕێبازی بارزانیی نەمر دەکاتەوە.
دەقی پەیامی مەکتەبی سیاسیی پارتی دیموکراتی کوردستان.
بەرپابوونی شۆڕشی مەزنی ئەیلوول بە ڕابەرایەتیی بارزانیی نەمر و پێشڕەویی پارتیمان لە (١١ی ئەیلوولی ١٩٦١)، کاریگەرییەکی زۆری ھەبوو لەسەر چارەنووسی سیاسیی بزاڤی ڕزگاریخوازی کورد و دۆزی ڕەوای نەتەوەیی و نیشتمانیمان، شۆڕش بە پەیامێکی ھەقخوازانە و ڕەوا سەلماندی، کە ڕەگ و ڕیشەی ئیرادە و ورەی پۆڵایینی ڕۆڵەکانی گەلەکەمان لەبن نایەن و تا بەدیھێنانی ئامانجەکانمان کۆڵ نادەن.
ئەو بزووتنەوە سیاسییە لەو ھەلومەرجەی ئەوسادا لە ڕووی سیاسی، کۆمەڵایەتی و سەربازییەوە، ھەڵگری کۆمەڵێک خەسڵەت و تایبەتمەندیی خۆی بوو، ناسنامەیەکی جیاوازیشی ھەبوو بە جۆرێک خەباتێکی نەپساوەی گشتگیر بوو بۆ کۆتاییھێنان بە شەوەزەنگی زۆرداری و نەھامەتی.
یەکێک لە بنەما بێوێنە و ڕەسەنانەکانی شۆڕش، ڕەنگدانەوەی کۆمەڵگەی فرەڕەنگی کوردستان و کولتووری شۆڕشگێڕیی کوردایەتی و نیشتمانپەروەری بوو، لەسەرینی ئەمەشەوە شۆڕشێکی درێژخایەن، مەزن و سەرتاسەری بوو، لەو ڕێگایەشدا لەسەرجەم چین و توێژەکان، شۆڕش قوربانییەکی بێشوماری پێشکەش بە خاک، نەتەوە و کێشە ڕەواکەمان کرد.
شۆڕشی ئەیلوول و پارتیمان بە نەخشەڕێگایەکی نوێ، گونجاو و ڕێکوپێک بۆ بەدیھاتنی بەرژەوەندییە باڵاکانی گەل و نەتەوەکەمان ڕێگای تێکۆشانی گرتەبەر و ھەرگیزاوھەرگیز لەسەر ئەو ڕێچکە و ڕێبازە لایان نەدا، نەک لە پیلانگێڕی و ناپاکیەکان سازش و سڵ نەکرایەوە، بەڵکوو سوورتر بووین لەسەر جۆشدان و ڕابوونی سیاسی، ئابووری، کولتووری، ھۆشیاربوونەوە و گەیشتن بە ئامانجەکانمان.
شۆڕشی مەزنی ئەیلوول سەرتاسەری کوردستانی کردە یەک ھێز و یەک دەست، ھەموو سنوورە ناوچەیی، ئایینی و مەزھەبییەکانی سڕییەوە و تەواوی گەلی کوردستانی لە چوارچێوەی ھێزێکی بەرھەڵستکارانەی پتەو دژ بە دیکتاتۆری و ستەمکاران، بەرەو یەک ئامانج یەکخست.
شۆڕشی مەزنی ئەیلوول تەنیا دەروازەی یادگە و یادەوەرییەکی ھاوبەش و زیندووی گەلەکەمان نییە، بەڵکوو بزووتنەوەی ڕزگاریخوازی کوردستانی بۆ قۆناغێکی سیاسیی پێشکەوتووتر گواستەوە، بە جۆرێک لەسەر گۆڕەپانی سیاسیی ناوخۆیی و جیھانیدا وەک ھێزێکی کاریگەر و خاوەن بڕیار ڕۆڵی شیاوی خۆی بگێڕێت و چەندین دەستکەوتی گرنگ و مێژووییش بەدیبێنێت لەوانەش: ڕێککەوتننامەی ١١ی ئاداری ١٩٧٠، زەمینەساز و پاڵنەری ڕاپەڕینی سەرتاسەریی ڕۆڵەکانی گەلەکەمان و، بنیاتنانی قەوارەی سیاسی و دەستووریی ھەرێم.
ئەم بۆنەیە بە دەرفەت دەزانین وەک ھەمیشە جەخت لەسەر ڕێبازی ڕەگداکوتاوی کوردایەتی، نەتەوەیی و ڕێبازی بارزانی و پارتایەتیمان بکەینەوە بۆ پتەوکردنی ھەماھەنگی و ھاوھەڵوێستیی سەرجەم حیزب و لایەنە سیاسییەکانی کوردستان بۆ چارەسەرکردنی کێشە و گیروگرفتەکان، پاراستنی قەوارەی دەستووری و سیاسیی ھەرێمی کوردستان و دەستکەوتەکانمان.
لەو یادە مەزنەدا پیرۆزباییەکی گەرم لە جەماوەری دڵسۆزی کوردستان و خەباتکار و پێشمەرگە قارەمانەکانی شۆڕش دەکەین، سەری ڕێز و نەوازش بۆ شەھیدانی ڕێگای ڕزگاری و سەربەخۆییی کورد و کوردستان دادەنوێنین، سڵاو و ڕێز لە خانەوادە و کەسوکاری سەربەرزی شەھیدە نەمرەکانمان، سڵاو لە ھێزی پێشمەرگەی کوردستان.
لەم بۆنە گرنگەدا، پەیمان بۆ سەرۆک بارزانی، بۆ گەل و نیشتمان دووپاتدەکەینەوە کە لەسەر ڕێبازی بارزانی بەردەوامبین بۆ بەدیھێنانی تەواوی ئامانجەکانی گەلەکەمان.
سڵاو لە بیرەوەریی (٦٥) ساڵەی شۆڕشی مەزنی ئەیلوول.
سڵاو لە گیانی پاکی بارزانیی نەمر و کاکە ئیدریسی ھەمیشە زیندوو.
بەرز و شەکاوە بێت ئاڵای پیرۆزی کوردستان.
ھەمیشە گەلەکەمان سەربەرز و کوردستانیش ھەر ئاوەدان.
مەکتەبی سیاسیی پارتی دیموکراتی کوردستان