زهری نهوزاد
پەیوەندیا د ناڤبەرا حکومەتا فیدرال یا عێراقێ و حکومەتا هەرێما کوردستانێ ئێکە ژ گرنگترین پرسێن سیاسی، کو ڕاستەوخۆ کاریگەری ل سەر سەقامگیری و پاشەڕۆژا سیاسی یا عێراقێ هەیە، ب ل بهرچاڤگرتنا گرنگیا دەستووری و نیشتمانی یا ڤێ پەیوەندیێ د چوارچۆڤێ سیستەمێ فیدراڵی یێ عیراقێ دا، سەرەدانا ڕێزدار مەسرور بارزانی، سەرۆکێ حکومەتا هەرێما کوردستانێ بۆ بەغدا، پێنگاڤەکا سیاسی یا گرنگ بوو ژ ڕوویێ ڕەهەندێن ستراتیژی ڤە، کو ڕەنگدانەڤەکا ڕوون بوو بۆ بهر بهێزكرنا دیالۆگا سیاسی و چەسپاندنا لێکتێگەهشتنێ د ناڤبەرا هێزێن سیاسی یێن عێراقێ دا.
ئەڤ پێنگاڤا ئەڤرۆ هەڵگرا ئیرادەکا سیاسی یا هەڤپشک بوو بۆ ئاڤاکرنا باوهریێ د ناڤبەرا هەولێر و بەغدا دا، ب تایبەتی ل بن ڕۆشنایا وان ئاستەنگێن سیاسی، ئابووری و ئەمنی یێن کو د نوکە دا ڕوو ب ڕوو عیراقێ بووین، کو پەیوەندی ب پرسێن هەستیار ڤە هەبوو، ژ وان ژی: نەفت و گاز، بودجێ فیدراڵی، دەستهەلاتێن ئیداری و دەستووری و هەماهەنگیا ئەمنی، ژبەر هندێ، بەردەوامیدان ب دیالۆگا سیاسی د ناڤبەرا هەردوولایان دا پێدڤییەکا نیشتمانی بوو بۆ دابینکرنا سەقامگیریا عیراقێ و پاراستنا ئێکڕێزیا سازی و پێکهاتێن جودا.
سەرەدانا ڕێزدار مەسرور بارزانی بۆ ئەنجامدانا دیدارێن گرنگ دگەل چەند سەرکردەیەکێن سیاسی یێن عیراقێ، دووپاتكرنا زمانێ دیالۆگێ و لێکتێگەهشتنێ یه، کو د ئەنجامێ پێنگاڤێن سیاسی یێن ڤێ سەرەدانێ دا پاراستنا بەرژەوەندیێن هەڤپشک د ناڤبەرا بەغدا و هەولێر دا بوو، ههڤدهم رژدبوون بوو بۆ ڕێزگرتن ل دەستوورێ عیراقێ وەک چوارچۆڤەیەکێ بنگههین بۆ ڕێکخستنا پەیوەندیێن د ناڤبەرا حکومەتا فیدراڵی و حکومەتا هەرێما کوردستانێ دا، هەروەسا دهربرینه ژ تێگەهشتنەکا کوور د قۆناغا سیاسی یا نوکە دا، کو پێدڤی ب هاریکاریا د ناڤبەرا هێزێن سیاسی یێن جودا یێن عیراقێ دا هەیە بۆ ڕوو ب ڕووبوونا قەیرانێن ناڤخۆیی و ئالۆزیێن دەڤەرێ.
ڕۆڵێ کاریزمایا ڕێزدار مەسرور بارزانی د برێڤەبرنا کاروبارێن ئەمنی و سیاسی و ئیداری دا، سەنگەکێ سیاسی یێ مەزن بوو بۆ سەرەدانێ، ب تایبەتی ل بهرچاڤگرتنا پێگەهێ وی وەک ئێک ژ کەسایەتیێن کاریگەر د بڕیاردانێ دا ل هەرێما کوردستانێ، کو ڕێ خۆشکەر بوو بۆ دروستکرنا کەشوههوایەکێ ئەرێنیتر د ناڤبەرا هێزێن سیاسی یێن جودا دا. زێدەباری ڤێ چەندێ، پەسهندکرنا گوتارەکا میانڕەو، چانسێ گەهشتنێ ب لێکتێگەهشتنێن دوم درێژ ل سەر پرسێن ههلاویستی د ناڤبەرا بەغدا و هەولێر دا زێدهتر لێدكهت.
نێزیکبوونا د ناڤبەرا بەغدا و هەولێر دا دێ کاریگەریەکا ئەرێنی ل سەر رهوشا ئابووری و ئەمنی یا عیراقێ هەبیت، ب تایبەتی ب ل بهرچاڤگرتنا وان ئاستەنگێن دەڤەرێ و نێڤدەولەتی یێن کو ڕوو ب ڕوو دەڤەرێ دبن. هەماهەنگیا د ناڤبەرا هەردوولایان دا دێ بیتە ڕێخۆشکەر بۆ پشتەڤانیکردنا سەقامگیریا ناڤخۆ و بلندکرنا شیانێن دەولەتا عیراقێ بۆ سەرەدهریکرنێ دگەل قەیرانێن جودا، چ ئابووری بن، ئەمنی یان سیاسی، زێدەباری ڤێ چەندێ، سەرکەفتنا دانوستاندنا د ناڤبەرا هەردوولایان دا پەیامەکا دڵنیاکەره بۆ ڕایا گشتی یا عیراقێ و جڤاكا نیڤدەولەتی سەبارەت شیانا عیراقێ بۆ برێڤەبرنا ناکۆکیێن خۆ ب ڕێیێن ئاشتیانە و دەستووری.
ئەڤ سەرەدانا ڕێزدار مەسرور بارزانی بۆ بەغدا، هەڵگرێ پەیاما بهێزكرنا لێکتێگەهشتنا نیشتمانی و چەسپاندنا هەڤپشکیا سیاسی بوو، کو دانوستاندن وەک کاریگەرترین ئامرازێ چارەسەرکرنا ناکۆکیێن سیاسی و ئاڤاکرنا پاشەڕۆژەکا سەقامگیرتر بۆ عیراقێ دمینیت.