ھەولێر -KDP.info- بەڕێوەبەری گشتی سەرچاوەکانی ئاوی ھەرێمی کوردستان گوتی "حکوومەتی ھەرێمی کوردستان پشتگیری لەو ھاووڵاتییانە دەکات پۆندی ھەرەوەزی دروست دەکەن، تا ئێستا سێ پۆندی لەو جۆرە دروست کراون کە سوودی زۆر باشی بۆ خەڵک دەبێت.
دکتۆر کاروان ھەورامی، بەڕێوەبەری گشتی سەرچاوەکانی ئاوی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند "لە قەزای ئامێدی دەست بە دروستکردنی پۆندێکی دیکەی ھەرەوەزی کرا، ئەو پۆندە دەبێتە سێیەم پۆند لە ھەرێمی کوردستان کە ڕێکخراوی wfp ھاوکاری و پشتیوانیی دارایی پێشکەش کردووە، چونکە حکوومەتی ھەرێمی کوردستان گرنگی زۆر بە دروستکردنی پۆند لە ھەرێمی کوردستان دەدات، ھەر بۆیە لەسەر دەستپێشخەری حکوومەتی ھەرێمی کوردستان و بەڕێوبەرایەتی سەرچاوەکانی ئاو لە ھەرێمی کوردستان ئەو پۆندانە دروست دەکرێن."
دکتۆر کاروان ھەورامی گوتیشی "پۆندی ھەرەوەزی خەڵک و حکوومەتی ھەرێمی کوردستان پێکەوە دروستی دەکەن، ئەمەش ھەنگاوێکی باشە ھەم بۆ نەھێشتنی ڕۆتین و ھەم تێچووی دروستکردنی کەم دەکاتەوە و نابێتە ئەرکیش بۆ سەر بودجەی گشتی، بەشێوەیەکی زۆر زانستییانەش دروست دەکرێن، بۆیە خەڵکی ھەر گوندێک بیەوێت پۆندی ھەرەوەزی دروست بکەن، حکوومەتی ھەرێمی کوردستان پاڵپشتییان دەکات، چونکە سەرۆکی حکوومەتی ھەرێمی کوردستان، ملیارێک و ٥٠٠ملیۆن دیناری بۆ ھاوکاریی ئەوانە تەرخان کردووە پۆندی ھەرەوەزی دروست دەکەن."
ئەو پۆندانەی دروست دەکرێن بۆ چەندین کەرتی جیاجیا سوودی لێ وەردەگیرێت، وەکو کەرتی کشتوکاڵ، گەشتوگوزار، سامانی ماسی، ئاژەڵداری و کەرتی دیکە.
بڵند ئیبراھیم