دھۆک-KDP.info- دیارە کو شارستانییەت و پێشڤەچوون دروخسارێن هەمی پلان و کار و چالاکیێن حکومەتا هەرێما کوردستانێ دانە، ب شێوەیەکێ هەمی بریارێن حکومەتی خەلکێ هەرێما کوردستانێ بەرەف قوناغەکا دی یا پێگەهشتنێ دبەت.
ئامیرێن ATM، یان ژی ئامیرێن بانکی یێن راكێشانا پارەی، ئەو ئامیرێن ب بوچوونا مەحموود مەجید، خەزنەدارێ رێڤەبەرییا گەنجینەیا دهۆک، خەلکێ مە بەرەف قوناغەکا باشتر برییە، وکارێ رێڤەبەریێن مە یێن حکومی ب شێوەیەک بەرچاڤ ئاسانکرییە.
مەحموود مەجید بۆ مالپەرێ فەرمی یێ پارتی دیموکراتی کوردستان: “ب هەبوونا ڤان ئامیرەیان دانا مووچەیان ب شێوەیەکی بەرچاڤ هاتییە رێکخستن، ئەم ل رێڤەبەرییا گەنجینەیا دهۆک هەمان کارێن خۆ یێن روتینی ئەنجام ددەین، لێ دهەمان دەمدا کارێ هەمی ژمێڕیارێن رێڤەبەریێن حکومی ئاسان بووییە، ب شێوەیەکێ لەوانەیە دگەل هاتنا هەر موچەیەکێ بۆ ماوێ دوو رۆژ هەتا سێ رۆژان ژمێریار مژویلی برن و ئینانا موچەیێن فەرمانبەرێن فەرمانگەهێن خۆ ببان، هەتا کو مووچە گەهشتبان فەرمانگەهێن وان، چونکە پرۆسەیا گەهاندنا مووچەیان ب فەرمانگەه و رێڤەبەرییان ژی چەندین رێکار و پێنگاڤێن خۆ هەبوون، دگەل هەبوونا گەلەک شاشی و ئاریشەیان، لێ دنوکە دا ژێدەرێ وەرگرتنا مووچەیان ئێکە، ئەو ژی سیستەمێن بانکی نە، و ب بورینا ٧٢ دەمژمێران و ب بێ هیچ شاشییەک یان وەستیانەک مووچە ب تەمامی دهێنە پارڤەکرن.”
نەمانا قەرەبالغیێ ل بانک و رێڤەبەرییان وێنەیەکێ دی یێ شارستانییەت و پێگەهشتنێ نیشان ددەت، ژقوناغەکێ کو دگەل هەلینا هەتاڤێ مووچە خور ل بەر دەرێن بانکان کووم ببن ژبۆ وەرگرتنا مووچەیێن خۆ ژبەر ترسا ب دویماهیک ئینانا دەواما فەرمی یێ بانکێ یان رێککەفتنا بهێنڤەدانان، ئێکسەر ژبۆ قوناغا سیستەمکرنا وەرگرتنا مووچەی و بەردەستکرنا ڤێ خزمەتگوزاریێ بۆ هەر ٧ رۆژێن حەفتیێ و بۆ ٢٤ دەمژمێرێن رۆژێ، ب شێوازەکێ هەر دەما تە بڤێت و ل کیژ ئامیرێ تە بڤێت و تە چەند کوژمێ پارەی ژی بڤێت، تۆ دشێی دسنوورێ مووچەیێ خۆ و پارێ خۆ یێ دەستنیشانکری وەربگری.
مەحموود دبێژیت: ڤان ئامیرەیان خەلک فێری تشتەکێ نوی کر، ل دەمێ چوونا خەلکێ مە بۆ ژدەرڤەی وەڵاتی ب کارئینانا ڤان ئامیران بۆ وان نە ئاسایی نەبیت، و جورەکێ شارەزایێ ژوەڵاتێ وان دگەل وان دا هەبیت،
و سەبارەت ب ڤێ چەندێ ژی هەلات سەلمان، رێڤەبەرا بانکا جیهان تایێ دهۆک، تایبەت بۆ مالپەرێ فەرمی یێ پارتی دیموکراتی کوردستان دبێژیت: “ئەڤ ئامیرە ب تنێ ل وەڵاتێن پێشکەفتی هەنە و ئەگەر دروست بهێنە ب کارئینان ئاسنکارییەک ئێگجار زوور ئێخستییە کارێ فەرمانبەر و فەرمانگەهان، و ئەو ب سیستەمێ ئینتەرنێتێ و سیستەمێ بانكی ڤە دگرێداینە، و بۆ ٢٤ دەمژمێرێن رۆژێ لیژنێن گەرووک هەنە ژبۆ پر کرنا وان ئامیران ژپارەی، و ب رادەیا ١٠٠٪ دسکیورتی کرینە، و هەر دەما شاشییەک ژلایێ فەرمانبەرەکێ هاتە رویدان وەک خەلەت ب کارئینانا کارتا خۆ ئێکسەر ژلایێ تیمێن مەڤە دهێتە چارەسەرکرن.”
نەوزاد عەلی، هاوڵاتی: ئەز ژی بەژدارەکێ پرۆسا هەژماری منم، ئەڤە ئێک ژباشترین بریارێن حکومەتێ بوویە، جاران بۆ چەند دەمژمێران ئەز ل بانکێ ل هێڤییا موچێ خۆ دمام و جاران ژی دەوام ب دویماهیک دهات و ئەز دەست خالی ڤەدگەریام ژبەر قەرەبالغێ، نوکە ئەز ب کەیفا خۆمە کیژ دەمێ رۆژێ و ل کیژ رۆژێ پارێن خۆ وەربگرم، هەروەکو من بخۆ چانتەک دانای بۆ لێکدانا پارێن خۆ.
ل دویماهیێ مەحموود مەجید دبێژیت: جاران خەلکێ گلەیی هەنە ژبۆ کێمییا ئامیران و جاران ژی ژبەر کێمییا وان و بکارئینانا گەلەک فەرمانبەران پارە تێدا نا مینن، ئەڤە ژی ژوان ئاریشەیانە یێن دشییان دایە بهێنە چارەسەرکرن، دیسان دخوازین ئامیرە ل جارێن بهێت ل جهێن گونجای تر بهێنە دانا نە ل سەر جادەیێن سەرەکی، بۆ هندێ دەمێ قەرەبالغا فەرمانبەران ل سەر ئامیران دروست دبیت، چ ئاریشەیێن ترافیکی ژی دروست نەبن.”
ل پارێزگەها دهۆکێ هەتا نوکە ٦٥ ئامیرە هەنە و بەردەوام دهێنە زێدەکرن و نوکە دپلان داییە هەتا ١٠ ئامیرێن دی ژی ل سەنتەرێ پارێزگەها دهۆکێ بهێنە زێدەکرن، و ئەو ئامیرە ژی ژبۆ ٨ بانکێن بەژدار دپرۆسێسا هژماری من دا هاتینە دابەشکرن، ئەو ژی بانکێن (جیهان, RT, TBI, التنمیە، العراقی الاسلامی، الاهلی العراقی، بغداد، BBAC).
سەجا شێرزاد دهۆک