ھەولێر-KDP.info- ڕاوێژکاری سەربازیی سەرۆکی ھەرێمی کوردستان ڕایدەگەیەنێت، حکوومەتی ھەرێمی کوردستان ھەنگاوی زۆر گەورەی بۆ یەکخستنی ھێزی پێشمەرگە ناوە و ئەو ھەنگاوانەش بوونەتە ھۆی دڵخۆشیی ھاوپەیمانانیش، کە ئەوانیش بەردەوام ھاوکار و پاڵپشتن و تاوەکو کۆتایی ساڵی داھاتوو سەرجەم ھێزی پێشمەرگە لە ١١ فیرقەدا یەک دەخرێن و ھەرێمی کوردستان دەبێتە خاوەن یەک ھێزی پێشمەرگە.
بابەکر زێباری، ڕاوێژکاری سەربازیی سەرۆکی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند، حکوومەتی ھەرێمی کوردستان و وەزارەتی پێشمەرگە بە ھاوکاریی ھاوپەیمانان ھەنگاوی زۆر باشیان بۆ یەکخستنی ھێزی پێشمەرگە ناوە و لە چوارچێوەی چەندین فیرقەی تازەدا یەک خراون، ئەمەش ھەنگاوێکی زۆر گرنگ و زۆر ئەرێنییە، کە داواکاریی ھەموو خەڵکی کوردستانە ھەرێمی کوردستان یەک ھێزی پێشمەرگەی ھەبێت و ھاوپەیمانانیش زۆر پێی دڵخۆشن، چونکە ھەنگاوی جیددی نراون و تاوەکو ئێستاش نزیکەی نۆ فیرقەی ھێزی پێشمەرگە دروست کراون، لەوانە دوو لە دھۆک و یەکێک لە بارزان و دوو لە ھەولێر دروست کراون و لە سلێمانیش چەند فیرقەیەک دروست کراون، بۆیە ھەنگاوی زۆر جیددی و خێرا بۆ یەکخستنی ھێزی پێشمەرگە نراون.
زێباری گوتیشی، بەپێی ئەو وادەیەی دیاری کراوە، تاوەکو کۆتایی ساڵی داھاتوو ھەموو ھێزی پێشمەرگە لە چوارچێوەی ١١ فیرقەی پێشمەرگە یەک دەخرێن و یەکەی ٧٠ و ٨٠ش نامێنن، چونکە ئەو ھێزانەی ئێستا لە فیرقەکان یەک دەخرێن، زیاتر لە ھەردوو یەکەی ٧٠ و ٨٠ن، بۆیە جیددیاتی زۆر ھەیە و حکوومەت سوورە لەسەر ئەوەی سەرجەم ھێزی پێشمەرگە یەک بخرێت و ھەرێمی کوردستان ببێتە خاوەن یەک ھێزی پێشمەرگە.
هاوکات دەشڵێ، ئەوە سێ ساڵە بەردەوام کاری لەسەر دەکرێت و لە سەرەتاکانی کابینەی ١٠یەم ھێزی پێشمەرگە یەک دەخرێت بە تەواوی و دەبێتە یەک ھێزی پێشمەرگە، بۆ ئەم پڕۆسەیەش ھێزەکانی ھاوپەیمانان زۆر ھاوکار و پاڵپشتن و بەردەوام لەگەڵ ھێزی پێشمەرگەدان بۆ ئەوەی یەک بخرێت و ئەوانیش بە ئەنجامەکان دڵخۆشن.
بڵند ئیبراھیم