هه‌ولێر-KDP.info- بەڕێوەبەری کشتوکاڵی هەولێر دەڵێ، حکوومەتی هەرێمی کوردستان هاوشێوەی ناوچەکانی هەرێمی کوردستان گرنگی بە ناوچە کوردستانییەکانیش دەدات، ئێستا پۆندێک لە مەخمور دروست دەکرێت بۆ ئەوەی سوود لە ئاوی سەرزەوی وەربگرن و ئاوی ژێرزەوی بپارێزن.
هێمن سەید موراد، بەڕێوەبەری کشتوکاڵی هەولێر، بە ماڵپەڕی فەرمیی پارتی دیموکراتی کوردستانی ڕاگەیاند، "لە چوارچێوەی گرنگیدانی حکوومەتی هەرێمی کوردستان بە کەرتی کشتوکاڵ و کەرتی ئاو، بە ئامانجی پاراستنی ئاوی ژێرزەوی و سوود وەرگرتن لە ئاوی سەرزەوی، لە هەموو ناوچەکان پۆند دروست دەکرێت، ئێستا لە مەخمووریش پۆندێک دروست دەکرێت، لە سەرگەڕانیش دروست کراوە، ڕاستە مەخموور دەکەوێتە سنووری ماددەی ١٤٠، بەڵام لەڕووی ئیداری دەکەوێتە پارێزگای هەولێر، ساڵانەش باران لە مەخموور کەمتر دەبارێت و کاریگەری کەمبارانی بەسەرەوە دیارە، بۆیە هەر پۆندێک دروست بکرێت کاریگەری ئیجابی دەبێت بۆ پاراستنی ئاوی ژێرزەوی و سوودوەرگرتن لە ئاوی سەرزەوی بۆ کەرتی کشتوکاڵ و پڕۆژەکانی ماسی و کەرتی ئاژەڵداری."
هێمن سەید موراد گوتیشی، "حکوومەتی هەرێمی کوردستان چۆن گرنگی بە ناوچەکانی هەرێمی کوردستان دەدات، بە هەمان شێوە گرنگی بە ناوچە کوردستانییەکانیش دەدات، هیچ کات جیاوازی ناکات لە نێوان هیچ ناوچەیەک و هەمووی بە هەرێمی کوردستان حیساب دەکات، لە ماوەی ڕابردوو حکوومەتی هەرێمی کوردستان دەرمانی قڕکەر و پێداویستی کشتوکاڵی وەکو ناوچەکانی هەولێر لە ناوچە کوردستانییەکانیش دابەش کرد، بۆیە حکوومەتی هەرێمی کوردستان گرنگی زۆر بە ناوچە کوردستانییەکان دەدات."
بڵند ئیبراهیم