ئوردن-KDP.info- ئەمڕۆ یه‌كشه‌ممه 2025/4/27 لە عەممان، بەڕێز نێچیرڤان بارزانی، سەرۆکی هەرێمی کوردستان، لەگەڵ شا عەبدوڵڵای دووەم کوڕی حسێن، شای شانشینی ئوردنیی هاشمی، کۆبووەوە.
لە کۆبوونەوەکەدا، پته‌وكردنى زیاترى پەیوەندییەکانی شانشینی ئوردنی لەگەڵ عێراق و هەرێمی کوردستان و فراوانکردنی هاوکاری لە بوارەكانى سیاسی، ئابووری و ئەمنیدا، تاوتوێ کران، هه‌روه‌ها ده‌رباره‌ى دوایین پێشهاتە ناوچه‌یى و نێودەوڵەتییه‌كانى جێى بایه‌خى هه‌ردوولا بیروڕایان گۆڕییه‌وه.
سەرۆک نێچیرڤان بارزانی پێزانینی قووڵی خۆی بۆ هەڵوێسته‌كانى شانشینی ئوردنیی هاشمی له پشتگیرى بۆ عێراق و هەرێمی کوردستان دەربڕی، هه‌روه‌ها پەیوەندییە مێژوویییه‌كان و دۆستایه‌تیى نێوان هەردوولاى به‌رز نرخاند.
لاى خۆیه‌وه شا عەبدوڵڵای دووەم خواستى وڵاته‌كه‌ى بۆ پته‌وكردنى پەیوەندییەکان و هاوکاریی هاوبه‌ش لەگەڵ عێراق و هەرێمی کوردستاندا دووپات کردەوە، هه‌روه‌ها داكۆكیی لە پابه‌ندیى ئوردن بۆ پشتگیریى هه‌ر هەنگاوێک کرد کە ئاسایش و سەقامگیری و پێشکەوتن بۆ گەلانی ناوچەکە بەهێز بکات.
له ته‌وه‌رێكى دیكه‌ى كۆبوونه‌وه‌كه‌دا، هه‌ردوولا جەختیان لەسەر گرنگیی هەماهەنگیی هاوبەش بۆ پاراستنى سەقامگیری و ئاشتی لە ناوچەکەدا کردەوە و باسیان له چه‌ند پرسێكى دیكه‌ى جێى بایه‌خى هاوبه‌ش، كرد.