ڕۆژئاوای کوردستان-KDP.info- سەرۆک بارزانی وەک مەرجەعی باڵای گەلی کورد، بەردەوام لە سەر ھێڵە بۆ یەکڕیزیی ھێز و لایەنە سیاسییەکانی کورد لە ھەر چوار پارچەی کوردستان، سیاسەتمەدارێکی ڕۆژئاوای کوردستانیش دەڵێت، ھەوڵەکانی سەرۆک بارزانی، کۆنفڕانسی نیشتیمانیی کوردی لە نێوان ھێزە کوردییەکانی ڕۆژئاوای کوردستان لێ کەوتەوە.

ڕۆژی ٢٦-٤-٢٠٢٥ لە چوارچێوەی دەستپێشخەرییەکانی سەرۆک بارزانی، لە قامیشلۆ بۆ یەکەم جار ھەموو ھێز و لایەنە سیاسییەکان کۆنفڕانسی نیشتیمانییان بەست، سیاسەتمەدارێک دەڵێ، کوردی سووریا پاڵپشتییەکانی سەرۆک بارزانی لەبیر ناکات.

کاوە عەزیز، سیاسەتمەدار ڕۆژئاوای کوردستان و مامۆستای زانکۆ، بە ماڵپەڕی فەرمیی پارتی دیموکراتی کوردستانی ڕاگەیاند، لە ڕۆژئاوای کوردستان جەژنی نەتەوەیی بوو بەھۆی بەستنی کۆنفڕانسی یەکگرتوویی کوردی بە ئامادەبوونی ھەموو ھێزەکان لە پاش ڕووخانی ڕژێمی بەشار ئەسەد، کە ئەنەکەسە و پەیەدە، داوایان لە جەنابی سەرۆک بارزانی کرد، ھاوکاریی ڕۆژئاوای کوردستان بکات تاکو کورد لە سووریا یەکگرتوو بێت، ئەوە بوو سەرۆک بارزانی نوێنەری خۆی ناردە ڕۆژئاوا و لەگەڵ مەزڵووم عەبدی کۆبوویەوە و پاشان عەبدی لە ھەولێر سەرۆک بارزانی پێشوازی لێکرد، دواتر لەگەڵ سەرکردەکانی ئەنەکەسە کۆبوویەوە بەرھەمەکەی یەکگرتوویی کوردی لێ کەوتەوە وەک بینییمان.

کاوە عەزیز دەڵێ، لە سەرەتای کردنەوەی کۆنفڕانسی یەکگرتوویی کوردی لە ڕۆژئاوا، سوپاسی سەرۆک بارزانی کرا، لە ھەوڵەکانی بۆ یەکگرتوویی کوردی، کوردانی ڕۆژئاواش ڕۆڵی برایانەی  سەرۆک مەسعود بارزانی قەت لە بیر ناکەن، بەڕاستی سەرۆک فاکتەری سەرەکی بوو بۆ ئەو ڕێککەوتنەی کە ھەموو کورد پێ خۆشحاڵ بوو لە چوار پارچەی کوردستان.

ئەو سیاسەتمەدارە ئاماژەی بۆ ئەوەش کرد، ئیدی پەیەدە و ئەنەکەسە و کورد بە گشتی لە ڕۆژئاوا بوونە یەک، شاندێکی سیاسیی کوردی پێکدەھێندرێت بۆ گفتوگۆ لەگەڵ دیمەشق، ڕێککەوتنی ئەمجارە جیاوازە لە ڕێککەوتنی یەک و دووی ھەولێر و دھۆک، ئەوکات شەڕی ناوخۆ لە سووریا ھەبوو و ڕژێم لە دەسەڵات بوو، ئێستا پاش کەوتنی ڕژێمی بەشار ئەسەد، دەکرێت لە ڕێگای یەکگرتوویی کوردی بتوانن ماف بەدەست بھێنن.

دەشڵێ، من بەدڵنیاییەوە دەڵێم بەم ڕێککەوتنەی کوردی لە سووریا دەتوانین دەستکەوتەکانمان بەدەست بھێنین، ئیدی دیمەشق بەبێ کورد ناتوانێت ھیچ ھەنگاوێک بنێت، کورد لە سووریا ژمارەیەکی قورسە، ئەمەریکا و ئەورووپا و ھێزەکانی ھاوپەیمانان پشتیوانیی کورد دەکەن، لەم ڕێککەوتنەدا تەنانەت تورکیاش ئۆپۆزسیۆن نەبوو.

ناوبراو ھێمای بۆ ئەوەش کرد، جەنابی سەرۆک بارزانی کەسایەتییەکی نیشتیمانیی گەلی کوردە، وەک مەرجەعی باڵای گەلەکەمان، لە ھەرچوار پارچەی کوردستان چاویان لە دەستپێشخەری و ھەوڵەکانیەتی، لە کۆنفڕانسی نیشتیمانیی یەکگرتوویی کورد، کاتێک ناوی جەنابی سەرۆک مەسعود بارزانی دەھێندرا، بە چەپڵەڕێزان پێشوازی لێ دەکرا لەلایەن ئامادەبووانەوە بەگشتی لە ھەموو ھێز و لایەنە سیاسییەکان، کە بێگومان ھەمووان سەرۆک بارزانییان خۆش دەوێت.

عەزیز ڕەسووڵ