لیزا کاکەیی
لە فەلسەفەی سیاسیدا کە باسی ڕاپەڕین دەکەین، ھەمیشە خەیاڵمان بۆ ئەوە دەچێت نەتەوەیەک، چینێک، ھێزێک ڕاپەڕیوە، بەڵام کۆنفرانسی ڕۆژئاوا جۆرێکە لە ڕاپەڕینی میللی کوردی، چونکە ئەم کۆنفرانسە سەرەتای ڕاپەڕینەکە نییە، بەڵکو بە ئەمانج گەیاندنی ڕاپەڕینی کوردیە. دەستپێکی ئەم کۆنفرانسە دەگەڕێتەوە بۆ کۆبوونەوە و ڕێککەوتنی دھۆک، ھەرچەندە بەربەست ھەبوون و زۆر کات نیەت ھەبووە بۆ لەباربردنی، بەڵام دواجار ئیرادەی کوردی و بارزانییەکان ئەوەبوو، دەبێت ئیرادەی کوردی لە چوارچێوەی کۆنفرانسێکدا ڕاپەڕینی یەکخیتابی دروست بکات.
گرنگیی کۆنفرانسی ڕۆژئاوا بە ڕاوەستان لەسەر دوو خاڵ باس دەکەم.
یەکەم، بەرپەچدانەوەی ئەو دەنگە لێڵانەی ھەمیشە خەون بەوەوە دەبینن، کورد لە خیتابە نەتەوەیی و نیشتمانییەکان، فرە خیتابی جیاواز و ھەمەڕەنگ و لەت لەت بکەن.
دووەم، کۆنفرانسی ڕۆژئاوا، ڕاپەڕین بوو دژی گیانی یەکتر قبوڵنەکردن، ئەو ترسەی سامت کرد کە ھەموو ئەترساین لە ڕۆژئاوا، کوردانی ئێمە لە مینبەری نەتەوەیی جیاواز، لەم ھەلومەرجە نوێیەی ئێستای سووریا بەرەو دیمەشق و بەرەو تونێلی دیالۆگی سووری بڕۆن و خاوەنی یەک ئەجیندا نەبن.
ھەڵبەتە ئەم دوو خاڵەی باسمکرد ھەروا ئاسان نەبووە، ھەروەکو جەنەراڵ مەزڵووم عەبدی، لە وتارەکەیدا پەیامێکی دڵسۆزانە و سوپاسگوزەرانەی بۆ سەرۆک بارزانی نارد، دانی بەو ڕاستیەدا دانا لە ماوەی چواردە ساڵی ڕابردوو سەرۆک بارزانی لایەنگری سەر سەخت بووە و لە کاتە سەخت و زەحمەتەکاندا، لەتەنیشت گەلی کورد و ڕۆژئاوا وەستاوە و گوتی، "ھاوکاری کردووین و ھەمیشە پێی گوتووین بەرگەی تەحەدیەکان بگرن، بگەنە ئەو قۆناغەی کە ئەمڕۆ بەدەستمان ھیناوە." ئەم دان پیانانەش گەواھیی ئەوەمان بۆ ڕوون دەکاتەوە کارەکتەری سەرۆک بارزانی چەند گرنگە بۆ دۆزی ڕەوای کورد لە ھەر پارچەیەکی کوردستان.
دیداری سەرۆکی ھەرێم لە فەرەنسا لەگەڵ سەرۆک ماکرۆن و پێشتر لەگەڵ ئەحمەد شەرع، بناغەیەکی دیبلۆماسی گرنگ بوو بۆ ئەوەی ئەم کۆنفرانسە ئاسۆیەکی گەشی تیا شرۆڤە بکرێت.
ناکرێت باسی سەردانی بەڕێز مەزڵووم عەبدی و کۆبوونەوەی لەگەڵ وەزیری دەرەوەی فەرەنسا (ژان ئؽف لۆردیان) نەکەین، کە وەکو خانەخوێ بەرھەمی ژیری و کارەکتەری دیبلۆماسیەتی ڕێزدار نێچیرڤان بارزانیە.
کەوابێت بارزانییەکان ھەمیشە خاوەنی ئەو کەلتوورە سیاسییە نەتەوەییەن کە کەپری کۆکەرەوەی دەنگ و ڕەنگە جیاوازەکان و ئیمپراتۆری دیبلۆماسیەتی کوردن.
خاتو ئیلھام ئەحمەد لە دەسپێکی گوتەکەی گەواھی ئەوەی دا، گوتی، "سەرۆک مەسعود بارزانی ھەمیشە خەمخۆری ڕاستەقینە و پشتیوانی بێ چەواشەکاری بووە بۆ مافی برا و خوشکەکانی لە ھەموو پارچەکانی کوردستان."
کەوابێت پیرۆزە کۆنفرانسی ڕۆژئاوا، ھەموو تاکێکی نەتەوەی کورد چاوی لەوەیە ھەروەکو چۆن دەستپێکی کۆنفرانستان بە سروودی ئەی ڕەقیب ھەر ماوە قەومی کورد زوبان دەستیپێکرد و کۆتاییەکەشی بە ھەمان پەیام بگەیەننە دۆستەکانتان تاکو دڵخۆش بن و نەیارەکانتان تاکو دڵتەنگ بن.