ھەولێر-KDP.info- ئەمڕۆ بەشی ڕۆشنبیری و ڕاگەیاندن، بە گوڕوتینەوە وەک وەفا و پەیمان نوێکردنەوەی ھەمیشەیی سەردانی مەزاری نەمرانیان کردوو بەرپرسی بەشی ڕۆشنبیری و ڕاگەیاندنیش لە گوتەیەکدا گوتی، بارزانیی نەمر و کاک ئیدریس فێری خەسڵەتە گەشەکانی ڕێبازی بارزانی کردووین، کە بریتین لە خواپەرستی، وڵات پارێزی، ژینگە پارێزی، یەکسانی، ئاشتەوایی کۆمەڵایەتی، پێکەوەژیان، لێبوردەیی، فرەیی، فرەڕەنگی ژیان و مرۆڤ دۆستی.
ڕۆژی پێنجشەممە ٢٤ـی ٤ـی ٢٠٢٥، بەشی ڕۆشنبیری و ڕاگەیاندنی پارتی دیموکراتی کوردستان بە سەرپەرشتیی د.سالار عوسمان، ئەندامی کۆمیتەی ناوەندی و بەرپرسی بەشی ڕۆشنبیری و ڕاگەیاندن، لەگەڵ سەرجەم دەزگا و ئۆرگان و ناوەندەکانی بەش و تۆڕی میدیایی کوردستان، لە زاخۆ تاوەکوو خانەقین، پێکەوە سەردانی مەزاری نەمرانیان لە دەڤەری بارزان کرد و لەلایەن خەڵات بارزانی، نوێنەری (سەرۆک بارزانی)و، لیژنەی پێشوازییەوە، پێشوازیی لە ھەڤاڵانی بەشی ڕۆشنبیری و ڕاگەیاندنی پارتی دیموکراتی کوردستان کرا.
د. سالار عوسمان لە وتەیەکیدا گوتی: بەڵێن دووپات دەکەینەوە بۆ ڕابەری ڕوحی گەلەکەمان (مستەفا بارزانیی نەمر) و (کاک ئیدریسی ھەمیشە لە یاد)، کە فێری خەسڵەتە گەشەکانی ڕێبازی بارزانی کردووین، کە بریتین لە خواپەرستی، وڵات پارێزی، ژینگە پارێزی، یەکسانی، ئاشتەوایی کۆمەڵایەتی، پێکەوەژیان، لێبوردەیی، فرەیی، فرەڕەنگی ژیان و مرۆڤ دۆستی.
ئاماژەی بەوە کرد: ھەر لە زاخۆوە تا خانەقین، لەم شوێنە پیرۆزە بەڵێن دووپات دەکەینەوە کە قەڵەم، وشە، پەیڤ، ڕستە، مانشێت، مانیفێستکانمان بکەین بە ھەوێنی ئاشتی، تەبایی، وڵات پارێزی و نیشتمانسازیی.
