ھەولێر-KDP.info- بەڕێوەبەری گشتیی دیوانی وەزارەتی ناوخۆی حکوومەتی ھەرێمی کوردستان ڕایدەگەیەنێت، بەھۆی ئەوەی ئۆتۆمبێلە بێ سەرەتاکان مەرجی سەلامەتییان تێدا نییە و یاسایی نین و مەترسی بۆ سەر شوفێر و ھاووڵاتیان دروست دەکەن، بە ھیچ شێوەیەک تۆمار ناکرێن و تەنیا چارەسەر ئەوەیە بکرێنە پارچە و بە یەدەگ پارچەکان بەکار بھێندرێن.
دکتۆر ھێمن میرانی، بەڕێوەبەری گشتیی دیوانی وەزارەتی ناوخۆی حکوومەتی ھەرێمی کوردستان، لە لێدوانێكی تایبەتدا بە ماڵپەڕی فەرمیی پارتی دیموکراتی کوردستانی ڕاگەیاند، بەھۆی فراوانیی سنوورەکانی ھەرێمی کوردستان لەگەڵ وڵاتان و شارەکانی عێراق و ھەبوونی رێگەی قاچاغ، ژمارەیان دیار نییە ئۆتۆمبێلی بێ سەرەتا چەندن لە ھەرێمی کوردستان، بەڵام ھەر ھاووڵاتییەک ئۆتۆمبێلێکی بێ تابلۆی کڕیبێت، ئاگادارە کە تۆمار ناکرێت و بنەماکانی سەلامەتیی تێدا نییە، بۆیە ھەر ھاووڵاتییەک ئۆتۆمبێلێکی بێ تابلۆ و بڕاوە بکڕێت، خۆی بەرپرسیارە و ئاگادارە، ئێمەش ناتوانین بەرپرسیارێتیی ئۆتۆمبێلێک ھەڵبگرین کە مەرجی سەلامەتیی تێدا نییە تابلۆی پێبدرێت.
میرانی گوتیشی، ئەگەر ئەو ئۆتۆمبێلانە تابلۆیان پێبدرێت، شەرعیەتی ھاتنەسەر شەقامت پێداون، کە بەشێکی ھەرە زۆری ئەو ئۆتۆمبێلانە لە ھەولێر پێیان دەگوترێت (کراون) و لە هەولێر پشکنین بۆ ھەمووان کرا، لە حەوت ھەزار زیاتر، کە وابزانم کەمتر لە ٢٠٠ ئۆتۆمبێل بڕاوە نەبوون و ئەوەی تر بڕاوە بوون، بۆیە ئامانجی پشکنینەکە ئەوە بوو پێش دوو ساڵ بەرچاوی حکوومەت ڕوون بێت کام لەو ئۆتۆمبێلانە مامەڵەی یاساییان لەگەڵ بکرێت، لەبەر ئەوەی کامیان بڕاوە بێت بچووکترین ڕووداو دەبێتە دوو پارچە، بۆیە جگە لەوەی ژیانی خۆی دەخاتە مەترسییەوە، ژیانی خەڵکی دیکەش دەخاتە مەترسییەوە.
بەڕێوەبەری گشتیی دیوانی وەزارەتی ناوخۆ دەشڵێت، ئێمە ناتوانین لە ڕووی یاساییەوە ئەو بەرپرسیارێتییە مێژوویی و مرۆییە بخەینە ئەستۆی خۆمان و سەلامەت نین، چونکە ئەگەر بەیاسایی بکرێن ژمارەیان زۆر لەوەی ئێستا زیاتر دەبێت، لەبەر ئەوەی لە عێراق و وڵاتانی دیکە ژمارەیان زۆرە و ئەگەر بەیاسایی بکرێن، ئەوکات ژمارەیەکی دیکەی زۆر ھاوردە دەکرێن و بارودۆخەکە تێکدەدرێت، بۆیە ئەوەی تۆمار نەکرابێت داواکراوە و لە ھەر شوێنێک بگیرێن دەستیان بەسەردا دەگیرێت، چارەسەریش ئەوەیە ھاووڵاتیان لێینەخوڕن و ئۆتۆمبێلەکان پارچە بکرێن و بکرێنە پارچەی یەدەگ، چونکە ھیچ رێگەیەکی یاسایی و مرۆیی نییە کە بتوانین مامەڵەیان لەگەڵ بکەین، لەبەر ئەوەی پەیوەندی بە سەلامەتیی مرۆڤەوە ھەیە، بۆیە ھیچ ئومێدێک نییە بۆ ئەوەی تۆمار بکرێن.
بڵند ئیبراھیم