دھۆک-KDP.info- رۆژێن دویماهیێ نە ژمەها رەمەزانێ، بازارێن شەڤێ ژی، ژخەلکێ پرن، ب شێوەیەکێ، دەرکەفتنا خێزانان ل شەڤان چەندین سالە بوویە نەریت.
ل ڤان ساڵێن دویماهیێ و پشتی قەستکرنەکا زور یا خێزان و گەنجان بۆ بازارێن سەرەکی و جهێن گشتی، پارێزگەها دهۆکێ و کومپانیێن تایبەت ساڵانە ل مەها رەمەزانێ رادبن ب ڤەکرنا خیڤەتێن بازرگانی یان بازارێن شەڤێن رەمەزانێ، تێدا ژمارەیەکا مەزن یا کومپانییان کەرستەیێن خۆ یێن جودا نیشان ددەن ب بهایێن گونجای و دگەل دا چەندین چالاکیێن هونەری و گوتنا هوزانێن ئاینی ئەنجام ددەن، و خەلک ژی رۆژانە ب هێڤییا بوراندنا دەمێن خۆش قەستا وان جهان دکەن.
دلێدوانەکا تایبەت دا شوكری جەمیل سەروکێ ژورا بازرگانی و بێشەسازی یا دهوک بۆ مالپەرێ فەرمی یێ پارتی دیموکراتی کوردستان گوت: “ساڵانە دڤێ مەهێ دا و ژبەر هاتنا مەها رەمەزانێ، ڤەلڤینەکا جودا دکەڤیتە بازاری، ژبەر خواستا خەلکێ ل سەر کەرستێن خوراکی هەروەسا جل و بەرگان ب هاتنا جەژنێ، و ئەڤ چەندە کارتێکرنەکا ئەرێنی ل سەر بازاری و ئالوگورا بازرگانی دکەت, و ل رەمەزانان نەریتێ ڤەکرنا بازارێن شەڤێن رەمەزانێ خۆشی و کارتێکرنەکا جوداتر یا ئابوری ددەتە بازاری چونکە درۆژێن ئاسایی دا دبیت بازارێن سەرەکی یێن دهۆکێ هەتا درەنگی شەڤ ب ڤی شێوازی دڤەکری نەبن”.
دایکا ئەحمەدی، هاولاتییا دهۆکێ، ل بازارێ تێرمینالێ بۆ kdp دبێژیت: بازارێن شەڤێن رەمەزانێ بۆ مە تایبەتن، ل رۆژێن ئاسایی ئەم ل بازاری بێ زار و ماندی دبین، لێ ل بازارێن شەڤێن رەمەزانێ، بەرۆڤاژی وێ چەندێ یە، ئەم قەست دکەینێ ژبۆ بوراندنا دەمەک خۆش و زاروکێن مە ژی دل خۆش دبن.
ئەڤین، هاولاتییا دهۆکێ، ل بازارێ تلفریکێ بۆ kdp دبێژیت: بازارێن رەمەزانێ جودانە، ئەم گەنجین لێ خێزانێن مە پشت راست مە دهنێرن ڤێرێ، چونکە بازارەکێ خێزانییە و گەلەک چالاکیێن خۆش و جودا لێ هەنە.
ل پارێزگەها دهۆکێ پێنج بازارێن تایبەت یێن شەڤێن رەمەزانێ ژبلی بازارێن سەرەکی هاتینە ڤەکرن، دوو ژوان ل سەنتەرێ پارێزگەها دهۆکێ ئێک ل گورەپانا تێرمینالا دهۆک و ئێک ژی ل گورەپانا تلفریکا دهۆک، و سێ ژی ل ئیدارا سەربەخۆ یا زاخۆ هاتینە ڤەکرن ئێک ل گورەپانا قشلا زاخۆ، و ئێک ژی ل گورەپانا پرا دەلال، و ئێک ژی بەرامبەر زانکویا زاخۆ.
سەجا شێرزاد