دکتۆر سامان سۆرانی
لەگەڵ ئەوەی سیاسەتی پارتی دیموکراتی کوردستان لەسەر ڕێبازێ دامەزراوە بە مەبەستی پاراستنی سەربەخۆیی هەرێمی کوردستان و دەستەبەرکردنی خواستی گەلی کوردستان، کە بریتییە لە مافی چارەنووس.
ئەم ڕێبازە لەلایەن مستەفا بارزانی دامەزراوە، کە زیاتر لە نیو سەدە خەباتی لە پێناوی کردووە و ئەمڕۆ لەلایەن سەرۆك بارزانی گەشەی پێ دەدرێ و جێبەجێ دەکرێ. بارزانی هەموو هەوڵێکی بۆ ئەوە بووە، کوردستان بتوانێ هاوسەنگییەكی بەهێز درووست بکات لە نێوان پەیوەندییە ناوخۆیی و هەرێمی و نێودەوڵەتییەکان، ئەویش بە بەکارهێنانی هێزی پێشمەرگە و دانایی سیاسی و توانای بونیادنانی هاوپەیمانی ستراتیژ.
ڕێبازی بارزانی بۆ بونیادنانی کوردستانێکی بەهێز بە گشتگیری و بە نەرمی و بە تۆکمەیی ماوەتەوە و خۆی لەگەڵ گۆڕانکارییە بەردەوامەکان لە ناوچەکە و لە جیهان گونجاندووە.
هەر بۆیە ئەمڕۆ دەبینرێ چۆن هەرێمی کوردستان توانیویە سەرەڕای ئالنگارییەکان بەردەوام بێت لە هەنگاونانی بۆ بەهێزکردنی یەكڕیزی لەناوخۆ و پەرەپێدان و گەشەسەندن.
پاڵپشتیکردنی فرەیی کۆمەڵگەیی لە ڕێگەی بەهێزکردنی پێکەوەژیانی ئاشتیانەی نێوان پێکهاتە نەتەوەیی و ئاینییەکان سەقامگیری ناوخۆیی پاراستووە و ڕێگربووە لە پەرتەوازەیی کۆمەڵگەیی.
ڕێبازی بارزانی، بۆ کوردستانێکی ئازاد و سەربەخۆ و سەروەر، ئاماژەیە بۆ ئەو نەخشە و پرنسیپانەی، کە پارتی دیموکراتی کوردستان بانگەشەی بۆ دەکات و جەخت لەسەر مافی گەلی کوردستان و زمان و کەلتوور و میژووی دەکاتەوە، کار بۆ ئەوەش دەکات، گەلی کوردستان خاوەنی بڕیاری سیاسی و کۆمەڵایەتی خۆی بێت، بێ هیچ دەستێوەردانێکی دەرەکی.
پارتی دیموکراتی کوردستان، کە لە ساڵی ١٩٤٦ بە سەرکردایەتی مستەفا بارزانی دامەزراوە ڕۆڵی گەورەی گێڕاوە لە خەبات بۆ دەستەبەرکردنی مافی گەلی کورد لە سەرتاسەری کوردستان و دامەزراندنی قەوارەی هەرێم و پەرلەمان و حکوومەتی هەرێم و بەڕێوەبردنی پرۆسەی ڕیفراندوم لە ساڵی ٢٠١٧.
ڕێبازی بارزانی هۆکار بووە بۆ ئەوەی پارتی دیموکراتی کوردستان بتوانێ یەکڕیزی كورد بپارێزێ و دامەزراوەکان لە هەرێمی کوردستان بەهێز بکرێ و هاوبەشی پتەو لەگەڵ لایەنەکانی تر ئەنجام بدرێ بۆ بەدیهێنانی سەقامگیری لە ناوخۆ.
پارتی دیموکراتی کوردستان، بە ڕەچاوکردنی ئەو وەرچەرخانە سیاسییانە لە ڕۆژهەڵاتی ناوەڕاست، سوودی لە پاڵپشتی هێزە نێودەوڵەتی و هەرێمییەکان وەرگرتووە بۆ پاڵپشتیکردنی مافەکانی گەلی کوردستان، چونکە دەزانێ، کە هاوپەیمانێتی لەگەڵ هێزە ڕۆژئاواییەکانی وەکو ویلایەتە یەکگرتووەکانی ئەمریکا دەتوانێ هاوکاربێت لە زامنکردنی ئایندە و قەوارەی هەرێم و ئامانجەکانی پارتی دیموکراتی کوردستان.
فرەچەشنکردنی سەرچاوەکانی داهات لە ڕووی ئابوورییەوە، دوور لە پشبەستن بە داهاتی نەوت، یەکێکە لە بنەماکانی ڕێبازی بارزانی، چونکە چارەسەری ئابووری دەبێتە بەشێکی سەرەکی زامنکردنی سەقامگیری لە هەرێم و زیادبوونی پاڵپشتی جەماوەری کوردستان بۆ ڕێبازی بارزانی.
بابەتی نوێکردنەوەی سیاسەتەکانی پارتی دیموکراتی کوردستان لە بواری لاوان و ئافرەتان و پەرەپێدانی کۆمەڵایەتی و دەرفەت ڕەخساندن بۆ گەنجان لە ڕێگەی بەرنامەکانی خوێندن و هەلی کار کلیلی ئایندەسازییە و بەشێکن لە بنەماکانی ڕێبازی بارزانی.
ڕێبازی بارزانی هەمیشە فەلسەفەی دیالۆگ و سیاسەتی دانوستانی بە هەند وەرگرتووە بۆ چارەسەرکردنی کێشە و ناکۆکییەکان لەگەڵ بەغدا، ئامانج لەو فەلسەفە و سیاسەتە دەستەبەرکردنی هاوسەنگی بووە لە نێوان داوا ڕەواکانی گەلی کوردستان و بەرژەوەندییەکانی عێراق، بەمەش توانیویە کاریگەری ئەرێنی هەبێت لەسەر ئایندەی هەرێم و عێراق.
ڕێبازی بارزانی کار بۆ ئاشتییەکی دادپەروەرانە دەکات، کە تیایدا ژیان بۆ هەمووان فەراهەم بێت و مافی چارەنووس بۆ هەمووان دەستەبەر بکرێت و سەرجەم پێکهاتەکانی کوردستان بەشدار بن لەو مافە، هەر بۆیە ئەم ڕێبازە بنەمایە بۆ بونیادنانی کوردستان.