دھۆک-KDP.info- لقێ ئێک ب هەلکەفتا ساڵڤەگەڕا سەرھەلدانا دھۆکێ پەیامەک بەلاڤکریە، ئەڤا ل خوارێ دەقێ وێ یە:
ل ڕۆژا ١٩٩١⁄٣⁄١٤ ھەڤدەم دگەل ژدایکبوونا بابێ ڕۆحیێ نەتەوا کورد بارزانیێ نەمر و پشتی مزگینیا گەھشتنا ھێزێن پێشمەرگەی د ناڤ خەلکێ باژێڕێ دھۆکێ دا بەڵاڤ بووی و نامەیێن سەرۆک بارزانی گەھشتین دەستێ کەسایەتیێن کاریگەرێن باژێڕی، پلانا سەرھەلدانا باژێڕێ دھۆکێ ھاتە دارشتن.
ل ڕوژا ٢٠٢٥⁄٣⁄١٤ خەلکێ ئازادیخوازێ باژێڕێ دھۆکێ ب ئێک دل و ب ئێک دەست، سینگێ خۆ دا دەھان سالێن ستەم وزۆرداریا ڕژێما باعسا فاشی، ب ئیرادەیەکا پۆڵاین ھەمبەر کەلھێن داگیرکاریێ ڕابوونە سەرخۆ و باژێڕێ خۆ ژ دام و دەزگەھێن ڕژێمێ ڕامالی.
خەلکێ سەرھەلدایێ دھۆکێ ل ڕۆژا ژ دایکبوونا ڕێبەرێ مەزنێ گەلێ کورد بارزانیێ نەمر، مزگینیا ئازادیا باژێرێ خۆ ڕاگەھاند و ھەردوو خۆشی پێکڤە ھمبێزکرن.
باژێرێ دھۆکێ، کو ب خۆینا ھەژمارەکا خۆرت و لاویێن گیان ل سەردەست ھاتە ڕزگارکرن، قەید و زنجیرێن دەھان ساڵێن بندەستیێ ھاتنە شکاندن، کچ و کوڕێن دھۆکێ گۆڤەندا ئازادیێ و ژدایکبوونا بارزانێ نەمر پێکڤە گێڕان، دایکێن شەھیدان مزگینیا سەرکەفتنێ ل گۆڕستنان گەھاندنە لاوێن خۆ، عەورێن ڕەشێن تاریێ ڤەڕەڤیان، کەنی و گڕنژین ڤەگەڕیاڤە سەر دێم و زارێ خەلکی و باژێڕێ دھۆکێ ب ئاشتی و ئازادیا خۆ شاد بوو.
دڤێ ڕۆژا پیرۆزدا خەلکێ کوردستانێ ب گشتی و یێ دھۆکێ ب تایبەتی، سەلماند کو چ ھێز نینین کو بشێن ھەمبەر ئیرادەیا ئازادیخوازیا گەلێ کوردستانێ ڕاوەستن.
سەرکەفتنا سەرھەلدانا گەلێ کوردستانێ بەرھەمێ خوین و خەبات و قوربانیێن دەھان ساڵێن پێشمەرگێ قەھرەمان و تەبایی و ئێکرێزیا گەلێ کوردستانێ و ھێزێن سیاسی و خوینا پیرۆزا شەھیدان بوو.
سەرھەلدانا پیرۆزا خەلکێ کوردستانێ دۆزا گەلێ کوردستانێ ڤەگوھازتە قۆنەغەکا دی و بوو ھێڤێن و بنەمایێ ئێکەم ھەلبژارتنێن ئازاد و ئاڤاکرنا پەرلەمان و حکۆمەتا ھەرێما کوردستانێ.
ب ڤێ ھەلکەفتنا پیرۆز گەرمترین پیرۆزباھیان ئاراستەی تەڤایا خەلکێ نیشتیمان پەروەرێ دھۆکێ دکەین، ب تایبەتی مالباتێن شەھیدێن سەربلند و پێشمەرگێن قەھرەمان و تەڤایا خەلکێ خۆڕاگرێ دەڤەرا بەھدینان.
سەرێ ڕێزێ بۆ گیانێ پاکێ شەھیدێن سەرھلدانێ و تەڤایا شەھیدێن ڕێیا ڕزگاریا کوردستانێ و سەروەرێ شەھیدان بارزانیێ نەمر و کاک ئیدریسێ ھەردەم ساخ دچەمینین.
ھزار سڵاڤ ل ٣٤ مین ساڵڤەگەڕا سەرھەلدانا پیرۆزا خەلکێ باژێڕێ دھۆکێ و سێمێلێ.
ھزار سڵاڤ ل ڕۆژا ژ دایکبوونا بابێ ڕۆحیێ نەتەوا کورد بارزانیێ نەمر.
کوردستان ھەرا ئارام و ئاڤەدان بیت.
دکتۆر نەوزاد عەبدوللا
بەرپرسێ لقێ ئێکێ پارتی دیموکراتی کوردستان
2025/3/14