دکتۆر سامان سۆرانی
ڕاستە بارزانی نەمر لە ١٤ی ئاداری ساڵی ١٩٠٣ لە کەناری چیای شیرین لە گوندی بارزان لە بنەماڵەیەکی ئایینپەروەری سەر بە تەریقەتی نەقشبەندی و تەژی لە هزری نەتەوەیی چاوی بە دونیا هەڵهێناوە و ئەمڕۆ ١٢٢ ساڵ بەسەر ئەو یادە تێدەپەڕێ و ئێمە بە شکۆ و ڕێزەوە پێشوازی لەو یادە دەکەین، بەڵام پێویستە ڕۆڵی لەدایکبوونی سەرکردەیەکی مەزن، کە بە خەباتی چەکداری و سیاسی و دیبلۆماسی لەپێناو سەربەخۆیی میللەتەکەی زۆر بەهەند وەربگرین.
ئەم یادکردنەوەیە جەختکردنەوەی لەسەر بەرده‌وامی هەوڵەکان بۆ دەستەبەرکردنی مافەکانی گەلی کوردستان.
بارزانی نەمر، کە سمبولی خەباتی ڕزگاریخوازی گەلێکی مافخوراوە، بە فەلسەفە و باوەڕهەبوون و پابەندبوونی بە یەكبوونی نەتەوەی کورد و دادپەروەی کۆمەڵایەتی و مافی ڕەوای گەلەکەی و بە خەباتی بێ ووچانی لە پێناو گەڕاندنەوەی شکۆ بۆ کوردایەتی لە ناو دڵی هەموو کوردستانییەك شوێنەواری خۆی بە شێوەیەکی ئەرێنی جێ هێشتووە.
مستەفا بارزانی وەکو کەسایەتییەکی ناوازە دامەزرێنەری ڕێبازێکە بۆ ئازادی و یەکسانی و هەڵگری پەیامێکی ڕوون و ئیلهامبەخشە بۆ هەموو ئازادیخوازێك، هەر بۆیە ئەمڕۆ كورد و بیانی لەسەرتاسەری جیهان بە شکۆوە یادی دەکەن.
بارزانی نەمر دیدگایەکی ستراتیژی ڕوونی هەبوو بۆ ئایندە و دەیزانی ئالنگارییەکانی بەردەم گەلی کوردستان چین و چۆن دەبێ بەسەریاندا زاڵ بین. لەسەردەمی سەتەمکاری و چەوساندنەوە ڕۆڵی بەرچاوی گێڕا لە بەخشینی هیوا و هاندانی تاكی کورد بۆ خەبات لە پێناو سەربەخۆیی و گەیشتن بە ئامانجەکان، هەر بۆیە توانی جەماوەری کوردستان و سەرجەم هێزە سیاسی و کۆمەڵایەتییەکان، بێ ڕەچاوکردنی ئایین و نەتەوە و تایەفە لە دەوری فەلسەفەکەی کۆ بکاتەوە و لە چوارچێوەی پارتی دیموکراتی کوردستان بۆ شۆڕش و ڕزگاری ڕێکیان بخات.
ڕیبازی بارزانی نەمر کارکردنە لە پێناو بونیادنانی ناسنامەیەکی نیشتمانی کۆمکار، تا بتوانێ پشکدار بێت لە بەهێزکردنی هەستکردن بە یەکبوون و هاوکاری.
هەوڵەکانی بارزانی نەمر تەنیا لە خەباتی سەربازی خۆی قەتیس نەکردبوو، بەڵکو توانای دانوستانی لەگەڵ هێزە هەرێمی و نێودەوڵەتییەکان بۆ دابینکردنی پاڵپشتی و هاوکاری گەلان و دەوڵەتانی دۆست و قایلکردنی کۆمەڵگەی نێودەوڵەتی بەوەی گەلی کوردستان مافی چارەی خۆنووسینی هەیە، دەسکەوتی زۆری بۆ گەلی کوردستان زامن کرد.
بارزانی نەمر بە پشوودرێژی خۆی و بەوەی دوو جار ڕووبەڕووی تێرۆرکردن بۆوە و چەندین جار لە سەنگەر مەرگی بە چاوی خۆی بینیوە، ئەوەی سەلماند، کە کەسایەتی سەرکردە و پێشەنگ پێویستە باوەڕی تەواوی بە قوربانیدان هەبێت، بۆ دەستەبەرکردنی ماف و بەهێزکردنی پێگەی گەلەکەی.
بۆیە ڕۆژبوونی بارزانی نەمر بە خاڵێکی وەرچەرخان لە مێژووی گەلی کوردستان ئەژمار دەکرێت و ئێمەش لەم یادە پیرۆزە، کە تاکی کوردستانی لە ڕێگەیەوە زۆر بەهای وەکوو ئازایەتی و خۆڕاگری و باوەڕبوون بە بەها بەرزەکانی نیشتمان فێر دەبێت، بە دەنگی بەرز دەڵێن: بژی کورد، بژی کوردستان.