خانەقین -KDP.info- بەرپرسی لقی ١٥ی پارتی دیموکراتی کوردستان لە خانەقین دەڵێت، ٣٤ ساڵ بەر لەئێستا و لە ڕۆژێکی وەکو ئەمڕۆ خانەقین لەسەر دەستی هێزی پێشمەرگە و جەماوەری خانەقین ئازادکرا و یەکەم شەهیدی ڕاپەڕینی خانەقینیش پێشمەرگەی لیژنەی ناوچەی پارتی دیموکراتی کوردستان لە خانەقین بوو، هەر بەو بۆنەیەوە شەوی ڕابردوو لە خانەقین گەورەترین ئاڵای کوردستان لە سەنتەری شاری خانەقین لە لایەن خەڵکەوە بەرزکرایەوە.
ئەکبەر حەیدەر خان، بەرپرسی لقی ١٥ی پارتی دیموکراتی کوردستان لە خانەقین، بە ماڵپەڕی فەرمیی پارتی دیموکراتی کوردستانی ڕاگەیاند، لە ١١/٣/١٩٩١دا ئەو ڕۆژە پرشنگدارە بوو، خانەقین لە سەر دەستی پێشمەرگە و جەماوەر و نیشتیمان پەروەری خانەقین ئازادکرا و یەکەم پێشمەرگە و مەفرەزە چوونە ناو خانەقین لە ڕاپەڕین پێشمەرگەکانی لیژنەی ناوچەی پارتی لە خانەقین بوون و یەکەم شەهیدیش بە خوێنی ئاڵی خانەقین شەهیدکرا ئەویش شەهید مەدحەت مەجید بوو، کە پێشمەرگە شاخی لیژنەی ناوچەی خانەقین بوو، کە لە دەروازەی شار شەهید کرا.
ئەکبەر حەیدەر خان گوتیشی، ئێمە وەکو لقی ١٥ی پارتی لە خانەقین ئەو ڕۆژە لە هەموو خەڵکی کوردستان و خانەقین و دەوروبەری پیرۆز دەکەین لە هەموو کوردێکی دڵسۆز، جگە لەوەی ١١/٣ ڕۆژی ڕاپەڕینی خانەقینە، ڕۆژی ڕاپەڕینی پایتەختی کوردستانە، ئەوەش لە هەموو خەڵکی کوردستان پیرۆز دەکەین، کە هاوکاتە بە یادی ڕێککەوتنی ١١ی ئادار کە لەسەر دەستی باوکی ڕۆحی نەتەوەیی کورد ئیمزا کرا و بۆیەکەم جار دەوڵەتی عێراق بە فەرمیی دانی بەوەنا مافی کورد بدرێت، ئێمە ئەو یادەش پیرۆز دەکەین، بۆیە سەری ڕێز و وەفا بۆ گیانی پاکی شەهیدانی ڕێگای کورد و کوردستان دادەنوێنین.
حەیدەر خان ڕوونیشی کردەوە، ئێمە ئەو ڕۆژە پرشنگدارەمان زیندوو کردۆتەوە و لە بارەگای لق ئامادەین و پەیامی خۆمان گەیاندووە و لافیتە و دروشمی ڕاپەڕین لە ناو شار و جەماوەری کوردپەروەری خانەقین بڵاوکراونەتەوە، شەوی ڕابردوویش گەورەترین ئاڵای کوردستان لە ناو سەنتەری شار بە بۆنەی ڕاپەڕینی خانەقین بەرزکرایەوە.
بڵند ئیبراهیم