Hewlêr-KDP.info: Li salvegera roja cîhanî ya zimanê dayikê, piraniya gelan roja cîhanî ya zimanê dayikê bi rêzdarî bibîr tînin, lê hêj gelê kurd wek gelekî bindest û zordîtî, li piraniya welatan zimanê wan di bin gefa tunebûnê de ye.

Mihemed Xanî, neviyê yek ji şaîr û rewşenbîrên mezin ên netewa kurd, girîngiya zimanê kurdî wek nasnameya neteweyî, li rêya malpera fermî ya Partiya Demokrat a Kurdistanê ve xist ber çavan û tekez li ser wê kir ku zimanê dayikê, bingeha nasname û rêz û rûmeta gelê kurd e.

Mihemed Xanî, ji bo malpera fermî ya Partiya Demokrat a Kurdistanê got, zimanê kurdî, mîraseke çandî û dîrokî ye ku divê bê parastin, herwiha amaje bi wê jî kir ku zimanê dayikê, kilîla parastina şaristanî û kevneşopiya kurdî ye.

Di berdewamiya axaftina xwe de, Xanî behsa têkiliya di navbera ziman û pêşeroja Kurdistanê de kir û got ” pêşketina zimanê kurdî, beşeke girîng e ji pêşketina siyasî û civakî ya gelê kurd. Ew bawer dike ku parastina zimanê dayikê, mafeke bingehîn û girîng e ji bo her neteweyekê.

Di demekê de ku cîhan roja navneteweyî ya zimanê dayikê bibîr tîne, gotinên Xanî girîngiyeke taybet heye. Wî tekez li ser wê kir ku zimanê kurdî ne tenê zimanek e, belkû nasname û ruha neteweyekê ye.

Di dawiya axaftina xwe de, Mihemed Xanî neviyê şaîr û rewşenbîrê mezin ê netewa kurd, daxwaz ji her kurdekî kir ku berpirsyariya parastin û pêşxistina zimanê kurdî bigire ser milê xwe. Ew bawer dike ku parastina zimanê dayikê, parastina pêşeroja netewe ye û her takekê kurd divê rola xwe di vî warî de bibîne.