میونشن-KDP.info- درێژه‌ى كارنامه‌ى دیدار و کۆبوونه‌وه‌کانیدا له میونشن، پاشنیوه‌ڕۆى ئەمڕۆ شەممە 2025/2/15 بەڕێز نێچیرڤان بارزانی، سەرۆکی هەرێمی کوردستان، لەگەڵ بەڕێز جۆناسان پاوڵ، ڕاوێژکاری ئاسایشی نه‌ته‌وه‌ییى به‌ریتانیا کۆبووەوە.
لە کۆبوونەوەکەدا پێشهاتە ئەمنییەکانی عێراق و ناوچەکە و بەهێزکردنی هاوکاریی ئەمنیى عێراق و هەرێمی کوردستان له‌گه‌ڵ به‌ریتانیا تاوتوێ کران، هەروەها تیشك خرایە سه‌ر هەماهەنگی لە بواری بەرەنگاربوونەوەی تیرۆر و ڕووبەڕووبوونەوەی هەڕەشەکانی داعشدا.
سەرۆک نێچیرڤان بارزانی بەردەوامیی پشتگیریی بەریتانیاى لە بواری ئاسایش و بەرگریدا بۆ عێراق و هه‌رێمى كوردستان به پێویست و گرنگ زانى، بەتایبەتی لە ڕاهێنانی هێزەکانی پێشمەرگە و بەهێزکردنی تواناکانیان، هه‌روه‌ها پابەندیی هەرێمی کوردستانی بۆ کاری هاوبەش بۆ دەستەبەرکردنی ئاسایش و سەقامگیری لە ناوچەکەدا، دووپات کردەوە.
لاى خۆیەوە، بەڕێز جۆناسان پاوڵ ستایشی ڕۆڵی هەرێمی کوردستانی لە پاراستنی ئاسایش و سەقامگیریدا کرد و پابەندیی به‌ریتانیاى بۆ بەردەوامیی پشتگیریی له عێراق و هەرێمى كوردستان و بەهێزکردنی هاوکاریی ئەمنیی نێوانیان بۆ ڕووبەڕووبوونەوەی مه‌ترسى و هه‌ڕه‌شه ئه‌منییه‌كان، دووپات كرده‌وه.
دۆخی سووریا و گرنگیى پاراستنى ئارامى و سه‌قامگیرى له ڕۆژهه‌ڵاتى ناوه‌ڕاست، تەوەرێکی دیکەی کۆبوونەوەکە بوو.