Hewlêr-KDP.info- Berdevkê Hikûmeta Herêma Kurdistanê Pêşewa Hewramanî di kongreyeke rojnamevanî de ragihand, ji bo ku daxwaz û peyamên Herêma Kurdistanê bigihînin hikûmeta federal, çend wezîr hatin destnîşankirin.
Bi amadebûna Serokwezîr Mesrûr Barzanî, Cîgirê Serokwezîr Qubad Talebanî, nûnerên Herêma Kurdistanê li hikûmeta federal û serokên fraksyonên Kurdistanî yên hemû aliyan, îro civîneke awarte ya Encûmena Wezîran li ser mijara mûçe û mafên darayî yên Herêma Kurdistanê hat lidarxistin.
Di civîna îro de, hemû wezîrên Hikûmeta Herêma Kurdistanê behsa pirsgirêkên derbarê maf û sayeşteyên darayî yên Herêma Kurdistanê de, yên ku ji aliyê hikûmeta federal ve nehatiye dayîn, kirin.
Pêşewa Hewramanî da zanîn: “Serokwezîr û cîgirê wî daxwaz ji wezîr û serokên fraksyonên Kurdistanî li Bexdayê kirin ku bi hev re hûrgiliyan bidin xuyakirin, eger rexne û kêmasî li hikûmeta Herêma Kurdistanê hebin, proje û pêşniyarên xwe di vê derbarê de pêşkêş bikin.”
Got jî, çend wezîrên ku nûneratiya Herêma Kurdistanê dikin hatin erkdarkirin ku peyamên Herêma Kurdistanê bigihînin hikûmeta Iraqê.
Berdevkê Hikûmeta Herêma Kurdistanê diyar kir ku ji bo îsal daxwazên Herêma Kurdistanê hene:
Yekem, divê îsal (2025) mûçeyên fermanberên Hikûmeta Herêma Kurdistanê bê garantîkirin û ti paşketin û pirsgirêk çênebin.
Duyem, divê Herêma Kurdistanê di guhertinên bûdceya giştî de, di madeyên girêdayî Herêma Kurdistanê de, ji bo parastina mafên gelê Herêma Kurdistanê, gotina xwe hebe.
Pêşewa Hewramanî got: “Di cibicînekirina daxwazan re, beşdarên civînê gotin, dibe ku biryarek were dayîn ku xizmeta Iraq û Herêma Kurdistanê neke, ku dê bandorê li aramiya navçeyê jî bike, ji ber ku heta niha Herêma Kurdistanê hemû nermbûn nîşan daye, tenê ji bo ku asayîş û aramiya civakî li Iraqê têk neçe. Lê eger bi vî awayî mafên gelê Kurdistanê bê binpêkirin, çi biryara vekişîna ji proseya siyasî ya Iraqê be, yan jî biryareke din be, dê li ser biryara aliyên siyasî bimîne.”
Pêşewa Hewramanî got: “Hikûmeta Herêma Kurdistanê kar dike ku li ser vê pirsê yekrêz be, ji ber ku ev pirs ne partîtî ye û girêdayî tevahiya Herêma Kurdistanê ye.”