دھۆک-KDP.info- ل سەر تەختێ خۆ پاڵداییە، چاڤ و هزرا وێ ژی سەد ژسەد ل سەر موبایلا زیرەکا دلەپ وێ دانە، ئەو نە مژویلا چاتینگ و بوراندنا ڤیدیویانە، ئەو یا بزنزا خۆ یا تایبەت ب رێڤەدبەت.خاتینا “جوان” کچەکا ٢٦ سالی یە، دەرچوویا زانکویێ یە، ونە خێزاندارە، ل دیدارا مالپەرێ فەرمی یێ پارتی دیموکراتی کوردستان بەحس ل بجه ئینانا خەونا زاروکینییا خۆ دکەت:
“ژزاروکینییا خۆ من حەز ل سەر کارێ دەستی هەبوو، هەردەم ئەز ل دەف داپیرا خۆ دروینشتم و من بەرێ خۆ ددا کارێ وێ، گەلەک جاران وێ ژی هندەک کار دایە ف من هەتا ئەز ژی فێربوویم، ئەڤرۆ من ئەڤ بەهرەیا خۆ کرە کارەک کۆ ئەز و جڤاکێ خۆ مفای ژێ وەرگرین، دنوکە دا و ب تنێ ب رێیا موبایلاخۆ من دوو کارمەند هەنە و گەلەک بکرێن تایبەت”.
مەزن دبێژن حەز ژکارێ خۆ بکە، کار ژی دێ حەز ژتە کەت و بەرهەمێن باش پێشکێشی تە کەت، جوان ژی ژوان گەنجایە یێن حەزا خۆ دایە کارێ خۆ و ب ڤیان کار دکەت،
جوان: “ئەڤرۆ رێکێن فێربوونێ و سەرکەفتنێ گەلەک ساناهیترن ژبەرێ، خولێن پێشخستنێ و یوتیوب و ئەپلیکەیشنێن موبایلێ و مابایلا زیرەک بخۆ ژی بوویە مەزنترین رێک، ئەز بخۆ بەژداری خۆلان بووم و من بەهرەیا خۆ پێش ئێخست، من دەست ب کاری کر و کارێ خۆ ژی هەمیێ ب رێیا ئەکاونتێن خۆ نمایش دکەم”.
ل پارێزگەها دهۆکێ نێزیک ٦٠٠ رێکخراوێن نە حکومی هەنە یێن ناڤخوی و ژوانا یێن نیڤدەولەتی، و پترییا وان خولێن بەردەوام یێن پێگەهاندن و پێشخستنا جڤاکی هەنە تایبەت ژبۆ تەخا گەنجان، ژبلی کو رێڤەبەریێن حکومی و رێکخراو و بنگەهێن حزبی ئەوژی بەردەوام ب ڤەکرنا خولان رادبن،
ل ساڵا ٢٠٢٤ێ ب تنێ ئەنجومەنێ دهۆک یێ ئافرەتان و ب تنێ د ١٠ هەیڤان دا ١١٠ خولێن جورا و جور ڤەکرینە، کو تێدا ١٨٧ ئافرەت مفاداربووینە، هەروەسا تورا رێکخراوێن CNO یا پێکدهێت ژ ٣٦ رێکخراوان ل پارێزگەها دهۆکێ دوو پرۆژێن هەرە مەزن یێن خولان دگەل خولەکا دی ڤەکرینە تێدا زێدەتری ٥٠٠ کەسان باوەرنامە و مفا وەرگرتینە،
و ئەڤە ب تنێ مە بەحس ل دوو سازییان کرییە، ئانکو ژبلی ڤان دوویان ئەگەر ژتێکرایێ ٦٠٠ رێکخراوان ب تنێ ٣٠٠ ژوان دساڵێ دا ئێک خۆل ڤەکەن، هۆسا دێ مە ٣٠٠ خۆل دئێک ساڵ دا ل پارێزگەها دهۆکێ هێنە ڤەکرن، و ئەگەر دهەر ئێک ژوان خولان دا ب تنێ ١٠ کەس بەژدارببن، ئەڤە ساڵێ ٣٠٠٠ گەنج ل دهۆکێ هاتنە پێگەهاندن.
جوان دبێژیت، “گەنجێن نوکە ل هێڤییا دامەزراندنا حکومەتێ نامینن، ئەو هەمی هەوڵ و بزاڤان دکەن ببن خودان کار، چ ل بن دەستێ کەسەکێ کار بکەن، یان ژی بخۆ کارەکێ تایبەت ڤەکەن، وژیارا خۆ یا تایبەت پێ برێڤە ببەن،
لێ هێڤییا مە ئەوە وەک گەنج، حکومەتا بەغداد ژی کێشەیان دگەل حکومەتا مە پەیدانەکەن و مووچێن فەرمانبەران ب دروستی بهنێرن، ژبەر کو ب هاتنا موچەیان کارێ مە ژی باشتر لێ دهێت و ئەم ژی ب وێرەکی کارێن خویی ڤەدکەین”.
سەجا شێرزاد