ھەولێر -KDP.info- گوتەبێژی یەکێتی خانەنشینانی ھەرێمی کوردستان گوتی "لیژنەیەکی ھاوبەش کار لەسەر یەکلاییکردنەوەی تەمەنی خانەنشینی دەکات کە پێویستە لە عێڕاق و ھەرێمی کوردستان یەک تەمەن خانەنشین بکرێن، چونکە ئێستا لە ھەرێم لە ٦٣ساڵی خانەنشین دەکرێن و لە عێڕاقیش لە ٦٠ ساڵی، بۆیە ئەوە یەکلایی دەکرێتەوە، ئەوانەی تا ئێستاش مووچەیان ھاوتا نەبووە پێویستە لە مانگی یەک مووچەیان بە ھاوتاکراوی وەربگرن".
سادق عوسمان "گوتەبێژی یەکێتی خانەنشینانی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند "لیژنەیەکی ھاوبەش لە نێوان ھەرێمی کوردستان و عێڕاق پێکھاتووە و کار لەسەر ھاوتاکردنی مووچەی خانەنشینیی ھەرێم لەگەڵ بەغدا دەکات، ئەو لیژنەیە ھێشتا نەگەیشتوونەتە ڕێککەوتنی کۆتایی لەبارەی تەمەنی خانەنشینی، لە ھەرێمی کوردستان داوا لە ھەموو بەڕێوبەرایەتییەکانی خانەنشینی کراوە ئەو فەرمانبەرانەی تەمەنیان بۆتە ٦٠ ساڵ فایلیان بۆ ئامادە بکەن، چونکە لە بەغدا لە ٦٠ ساڵی خانەنشین دەکرێن.
ئێستا گفتوگۆ دەکرێت بۆ ئەوەی یان لە عێڕاق بکرێتە ٦٣ساڵ یانیش لە ھەرێم تەمەنی خانەنشینی بکرێتە ٦٠ ساڵ، بەڵام ئەگەر بە ٦٠ ساڵی خەڵک خانەنشین بێت دەبێ لە یەک کاتدا چوار قۆناغی تەمەن خانەنشین بکرێن، ئەوانیش ٦٠ ساڵی، ٦١ ساڵی، ٦٢ساڵ و ٦٣ساڵین، ئەوەش دەبێتە ھۆی ئەوەی کەسانێکی زۆری خاوەن ئەزموون و بڕوانامە ناچار بن خانەنشین بن کە پێویستن، جگە لەوە دەبێ پاداشتی خانەشنینیشان پێ بدرێت، ئەویش دەکاتە پارەیەکی زۆر، بۆیە ئێستا خەریکی گفتوگۆن".
سادق عوسمان باسی لەوەش کرد "ھاوتاکردنی مووچەی خانەنشینانی ھەرێم لەگەڵ بەغدا، ئەوانەی دوای ٢٠١٤ خانەنشین بوون مووچەیان ھاوتا کراوە، ئەوانەی پێش ئەو وادەیە خانەنشین بوون ماون، بۆیە بڕیارە لە مانگی یەکی ئەمساڵ مووچەی ئەوانیش ھاوتا بکرێت، ئەوانەی ماون ژمارەیان کەمترە، بۆیە ئەوانەی مووچەیان لە ٥٠٠ھەزار کەمتر بوو، کۆن و نوێ، هەموویان مووچەیان بۆتە ٥٠٠ھەزار دینار، بەڵام ئەوانەی پێش ٢٠١٤خانەنشین بوون، ماوە بڕوانامەیان بۆ ھەژمار بکرێت و ١٠٠ھەزار دیناری بژێوی ژیانیشیان بو زیاد بکرێت، چونکە ئێستا ھەموو خانەنشینێک بەلایەنی کەمەوە ٦٠٠ھەزار دینار وەردەگرێت".
بڵند ئیبراھیم