هەولێر-KDP.info- جێگری سەرۆکی لیژنەی ئاسایش و بەرگری لە پەرلەمانی عێراق گوتی، ھەست بە مەترسیی ئاڵۆزییەکانی سووریا و سەرھەڵدانەوەی داعش دەکەین و دەمانەوێت بە وردی بەدواداچوون بۆ سنوورەکان بکرێت، بۆ ئەوەی ئاڵۆزییەکانی سووریا و سەرھەڵدانەوەی داعش، مەترسی بۆ سەر عێراق دروست نەکەن.
سەگڤان سندی، بە ماڵپەڕی فەرمیی پارتی دیموکراتی کوردستانی ڕاگەیاند: "وەکو لیژنەی ئاسایش و بەرگری، سەردانی بارەگای سەرەکیی ھێزەکانی پاسەوانیی سنوورمان کرد لەبارەی کۆنتڕۆڵکردنی سنوورەکان لەگەڵ سووریا و بەپێی ئەو بەرنامەیەی دانراوە، ئامادەکاریی باشیان کردووە و بڕیارە سەردانی مەیدانیی سنوورەکانیش بکەین لەسەر سنووری نێوان عێراق و سووریا، بۆ ئەوەی بە چاوی خۆمان ببینین بزانین چۆن ئامادەکاری کراوە.
سندی گوتیشی: "عێراق ھەست بە مەترسی دەکات بە ھۆی ئاڵۆزییەکانی سووریا و زیاتریش مەترسییەکانی لە ناوخۆ ھەیە، چونکە لە پێشابوور تا دەگاتە قائیم سنوور باش کۆنتڕۆڵ کراوە، بەڵام لە سنووری قائیم وەکو پێویست نییە و ترسەکەش لەوەیە ئەگەر ڕۆژێک مەترسی دروست بێت لەو سنوورە و ئاسانکاری بکرێت، بۆیە ھەموو ھەوڵێک دەدرێت سنوورەکان زۆر باش قایم بکرێن.
ناوبراو ڕوونیشی کردەوە: "ئەو ناوچانەی ھێزی پێشمەرگەی لێیە لەسەر سنوور، زۆر توندوتۆڵن و ھیچ بۆشاییەکی ئەمنی نییە، ئەوەی ھەیە لە سنوورەکانی ھێزە عێراقییەکان هەندێک مەترسی هەیە، چونکە ئێستا دوای ئەو ئاڵۆزیانە داعشیش دەستی بە جموجۆڵ کردووە و پێویستە عێراق حسابێکی باشی بۆ بکات و ڕێگە نەدات داعش کارا بێتەوە، بۆیە هەروەک چۆن ئێستا ھەماھەنگی لە نێوان پێشمەرگە و سوپای عێراق ھەیە، پێویستە زیاتر بێت و داعش نەتوانێت کارێک بکات کاریگەری لەسەر دۆخی ئەمنیی عێراق ھەبێت و ئاڵۆزییەکانی سووریاش بە ھەمان شێوە.
دەشڵێ: "نزیکەی ٢ ھەزار سەربازی سووریا بۆ عێراق رایان کردووە و ئێستا لە عێراقن و خۆیان بە چەکەوە ڕادەستی عێراق کردووە، کە ئێستا لە شوێنێکی تایبەت دانراون تاوەکو بڕیاری لێ دەدرێت.
لەبارەی ئەو پێشمەرگە و سەربازانەی باس لەوە دەکرێت کە لە زیندانەکانی سووریا ماون، جێگری سەرۆکی لیژنەی ئاسایش و بەرگری گوتی: تا ئێستا ھیچ پەیوەندییەک لە نێوان عێراق و دەسەڵاتی ئێستای سووریا نییە و پێویستە پەیوەندی ھەبێت، بۆ ئەوەی بتواندرێت بەدواداچوون بۆ ئەو پرسە بکرێت، چونکە بەبێ پەیوەندی ئەستەمە بتواندرێت بەدواداچوونی بۆ بکرێت و چاوەڕێ دەکرێت پەیوەندی ھەبێت، ئەوکات بەدواداچوونی بۆ دەکرێت و ئەوەی ئێستا دەکرێت، خەڵک خۆی بەدواداچوون دەکات.
بڵند ئیبراھیم