ھەولێر-KDP.info- بەڕێوەبەری قەرزی بچووک لە وەزارەتی کاروباری کۆمەڵایەتیی حکوومەتی ھەرێمی کوردستان ڕایدەگەیەنێت، بڕیاری لێخۆشبوون لە قەرزی بچووک کەوتە بواری جێبەجێکردنەوە و سوودمەندان دەتوانن لە ماوەی شەش مانگدا سوود لەو بڕیارە وەربگرن، کە نزیکەی ١٤ ملیار دینار لای خەڵک ماوە و بڕیاریشە لە ماوەیەکی نزیکدا قەرز بە ١٠٠ پڕۆژەی دیکەی بچووک و مامناوەند بدەین.
ئارام ئەنوەر، بە ماڵپەڕی فەرمیی پارتی دیموکراتی کوردستانی ڕاگەیاند: "بڕیاری حکوومەتی ھەرێمی کوردستان بۆ لێخۆشبوون لە قەرزی بچووک بە رێژەی ٢٠% کاریگەریی زۆر باشی دەبێت بۆ خەڵکی خۆمان، بۆ ئەوەی لێی سوودمەند بن و ئەم ھەفتەیەش فەرمانی وەزاری بۆ دەرچووە و گشتاندنی بۆ دەکرێت بۆ جێبەجێکردنی، کە کاریگەرییەکانیش لە ماوەی داھاتوودا ئاشکرا دەبن، بەڵام بە گشتی دەرفەتێکی زۆر باشە بۆ سودمەندبووان، بۆ ئەوەی لە ماوەی ئەم شەش مانگەدا بێن قەرزەکان بدەنەوە و لەو لێخۆشبوونە سوودمەند بن.
ئەنوەر گوتیشی: "لە ئێستادا ١٤ ملیار دینار قەرزی بچووک لای خەڵک ماوە و بەپێی خشتەی دیاریکراو بۆیان دانراوە قەرزەکە بگەڕێننەوە، کە ئەگەر بیانەوێت ئەو پارەیەی لەسەریان ماوە لەسەر یەک یاخود لە ماوەی ئەم شەش مانگەدا بیگەڕێننەوە سوودی لێ وەردەگرن، ئەمە ھەم بۆ ئێمە و ھەم بۆ خەڵکیش سوودی دەبێت.
ناوبراو باسی لەوەش کرد: "بەنیازین و لە پلاندایە لە ژێر ناوی پڕۆژەی گەشانەوە پاڵپشتیی پڕۆژەی بچووک و مامناوەند بۆ نزیکەی ١٠٠ پڕۆژە لە ئایندەیەکی نزیکدا بکەین، ئەویش بە مەرج و رێنمایی لە پڕۆژەی گەشانەوە دیاری کراوە، کە تا ١٥٠ ملیۆن دیناریشیان پێ دەدرێت و ئەمەش بەپێی پڕۆژەکان دەبێت.
بڵند ئیبراھیم