مێرگەسۆر-KDP.info- بەڕێوەبەری کارگەی زووم بۆ بەرھەمھێنانی شیرەمەنی ڕایگەیاند، ئێمە وەکو کارگەی زووم ٢٤بنکەی وەرگرتنی شیرمان ھەیە و کەلوپەل و پێداویستییان کڕیوە و بڕیارە بنکەی تازەی وەرگرتنی شیر لە ھەرێمی کوردستان بکەینەوە.
ئەندازیار شەھرام سەعید ناوخۆش، بە ماڵپەڕی فەرمیی پارتی دیموکراتی کوردستانی ڕاگەیاند: دوای کردنەوەی کارگەی زووم بۆ بەرھەمی شیرەمەنی، بەردەوام لە ھەوڵداین بۆ ئەوەی بنکەی تازەی وەرگرتنی شیر لە ھەرێمی کوردستان بکەینەوە و تاوەکو ئێستاش ٢٤ بنکەمان کردووەتەوە و لە ئێستاشدا کەلوپەلمان کڕیوە بۆ ئەوەی بنکەی تازە بکەینەوە، کە تیمەکانمان سەرقاڵی دیاریکردنی شوێنەکانن ، بۆ ئەوەی بنکەی لێ بکەنەوە و دیراسەی دەکەن، بۆیە پلانمان ھەیە لە ھەموو ھەرێمی کوردستان بنکەمان ھەبێت، تەنانەت لە پارێزگای سلێمانییش.
ناوخۆش گوتیشی: بەوپێیەی بەرەو وەرزی زستان دەچین، بەرھەمی شیر کەم بووە، ئەمەش کاریگەری لەسەر بەرھەم ھەبووە و بەنیازین لە ساڵی داھاتوودا شوێنی بەخێوکردنی مانگای شیر بکەینەوە، بۆ ئەوەی گرفتی کەمیی شیرمان بۆ دروست نەبێت، بەڵام خەڵکی خۆمان دڵنیا دەکەینەوە کە لە وەرگرتنی شیری ئاژەڵەکانیان بەردەوام دەبین، چونکە ئەمساڵ شیرمان لە ٢ ھەزار خێزان وەرگرتووە و ئەمەش وای کردووە خەڵکێکی زۆر ڕوو لە بەخێوکردنی ئاژەڵداری بکات و خەڵکمان ھەیە ئۆتۆمبێلی خۆی فرۆشتووە، بۆ ئەوەی مانگا بکڕێت بۆ شیر.
دەشڵێ: لای خۆمان ھەلی کارمان بۆ ٢٤٠ کارمەندی پیاو و ئافرەت رەخساندووە، بۆیە ئەو کارگەیە ھەنگاوێکی زۆر باش بوو بۆ ساخکردنەوەی بەرھەمی شیری ئاژەڵداران و بەرھەمی ناوخۆ و ھەلی کار بۆ خەڵکی خۆمان.
بڵند ئیبراھیم