ھەولێر-KDP.info- بەڕێوەبەری جێبەجێکاری سەرژمێری گشتی دانیشتووانی ھەرێم ڕایگەیاند، ئەمڕۆ بەفەرمیی قۆناغی سێیەمی سەرژمێری دەستی پێکردووە کە ٢٠ ھەزار بژمێر لە ھەرێمی کوردستان دەست بەکاربوون و لە ھەر خێزانێک ٧٠ پرسیاریان لێدەکەن، ئەمەش گرنگە بۆ ئەوەی لە داھاتوو لەسەر ئەو بنەمایە خزمەتی زیاتر پێشکەشی تاک بە تاکی ھاووڵاتیان بکرێت لەلایەن حکوومەتی ھەرێمی کوردستان.
مەحموود عوسمان، بەڕێوەبەری جێبەجێکاری سەرژمێری گشتی دانیشتووانی ھەرێم، بە ماڵپەڕی فەرمیی پارتی دیموکراتی کوردستانی ڕاگەیاند: ئەمڕۆ ٣٠-١١ لە عێراق و ھەرێمی کوردستان قۆناغی سێیەمی پرۆسەی سەرژمێری دەستیپێکرد، کە ٧٠ پرسیار ئاراستەی خەڵک دەکرێت، بۆ ئەو قۆناغە فراوانە لەم چەند ڕۆژەی ڕابردوو خولێکی پێنچ ڕۆژی بۆ ٢٠ ھەزار بژمێر لەسەرتاسەری ھەرێمی کوردستان کرایەوە لە زاخۆ تا خانەقین و لە ٤٤٥ ھۆڵ ئەنجامدرا، بژمێرەکان بۆ پرسیارەکان دەچنەوە لای خێزانەکان و ئەمڕۆ کاتژمێر ٩:٠٠ی بەیانی دەستیپێکرد و داواکارین ھاووڵاتیان ھاوکاربن و یەک کەس لە خێزانەکان ئامادەبێت بۆ وەڵامدانەوەی پرسیاری بژمێرەکانمان بەسە، کە پرۆسەکە بڕیارە تا ١٧-١٢ بخایەنێت و کۆتایی بە پرۆسەی سەرژمێری بێت.
مەحموود عوسمان گوتیشی: ھەر بژمێرێک ١٠٠ خێزانی بەردەکەوێت کە ٢١ ھەزار بلۆکمان ھەیە لە ھەرێمی کوردستان، بۆیە بژمێرەکان دەتوانن لەو ماوەیە کاری خۆیان بکەن و ھاووڵاتیان ھاوکاربن، چونکە لەسەر بنەمای ئەو پرسیارانە باشترین خزمەتگوزاری لە داھاتوو پێشکەشیان دەکرێت و پلانی زۆر باشی بۆ دادەنرێت لە لایەن حکوومەتی ھەرێمی کوردستان بۆ باشترکردن و پێشکەشکردنی باشترین خزمەتگوزاری بۆ تاک بەتاکی خەڵکی خۆمان، لەبەر ئەوەی زۆر گرنگە بۆ ھەموو بوارەکانی ژیانی خەڵک بتواندرێت چۆن خزمەتیان بکرێت، بۆیە پرسیارەکان فراوانن و بەسەدان پرسیار لە ٧٠ پرسیار چڕکراونەتەوە، بۆ ئەوەی وەزارەتەکان بزانن خەڵک پێویستی بەچی ھەیە خزمەتیان بکرێت لە ڕێگەی دانانی پلانی ھەنوکەیی و مامناوەند و درێژخایەن و ستراتیژی بۆ گەشەپێدانی زیاتری کوردستان.
عوسمان باسی لەوەشکرد: پرۆسەی سەرژمێری لە عێراق تازەیە بەشێوەی ئەلیکترۆنی و چوار کۆمپانیای زەبەلاحی جیھانی سەرپەرشتی دەکەن، کە لەیەک کاتدا ١٥٠ ھەزار تابلێت زانیاری ڕەوانە دەکات و ھەمووی وەرگیرێت، بۆیە ئەوە پرۆسەیەکی گەورەیە و گرفت دەبێت لەڕووی تەکنیکی و ھەمووشی چارەسەرکراون، بۆیە ھەوڵدەدرێت ھەرچی کەموکوڕی ھەیە چارەسەر بکرێت.
بڵند ئیبراهیم