دھۆک-KDP.info- بەڕێوەبەری سامانی ئاژەڵ لە دھۆک گوتی، دوای کردنەوەی گەورەترین پڕۆژەی سامانی ئاژەڵ لەلایەن سەرۆکی حکوومەتی ھەرێمی کوردستانەوە لە دھۆک، ئێستا پڕۆژەکە دەستی بە کار کردووە و بڕیارە ٣ ھەزار مانگای شیر بێنێت و شیرەکەشی لە کارگەی خۆیان بکاتە بەرھەمی شیرەمەنی، ئەمەش لە چوارچێوەی گرنگیدانی حکوومەتی ھەرێمی کوردستانە بە کەرتی ئاژەڵداری و بەرھەمی ناوخۆ.
ڕێدیر سدقی، بە ماڵپەڕی فەرمیی پارتی دیموکراتی کوردستانی ڕاگەیاند: "سەرۆکی حکوومەتی ھەرێمی کوردستان لە سەرەتای دانانی بەردی بناغەی گەورەترین پڕۆژەی بەرھەمی شیرەمەنی لە دھۆک ئامادە بوو و لە ماوەی ڕابردووشدا پڕۆژەکە تەواو بوو و ھەر خۆشی ئامادەی کردنەوەی پڕۆژەکە بوو، کە گەورەترین پڕۆژەیە لەسەر ئاستی ھەرێمی کوردستان و لە عێراقیش پڕۆژەی وا گەورە نییە، کە لەسەر ڕووبەری ھەزار دۆنم زەوی دروست کراوە و پێکھاتووە لە شوێنی بەخێوکردنی مانگای شیر و کارگەی دروستکردنی ھەموو جۆرە شیرەمەنییەک و شوێنی چاندنی عەلەف بۆ مانگا و شوێنی ٣ ھەزار مانگای شیری تێدا دەبێتەوە، کە رۆژانە دەتوانێت ١٢٠ تۆن شیر بەرھەم بێنێت، کە ھەر مانگایەک ٤٠ لیتر شیر دەدات.
سدقی گوتیشی: خەڵک دەتوانن سوود لە کارگەکە وەربگرن و شیری ئاژەڵەکانیانی تێدا ساخ بکەنەوە، بۆیە پاڵپشتییەکی باشە بۆ ئاژەڵدارانیش، چونکە پڕۆژەیەکی گەورەیە و سوودێکی زۆری بۆ پارێزگای دھۆک دەبێت و بەرھەمیش بۆ ھەرێمی کوردستان و عێراقیش دەچێت.
دەشڵێ: مانگاکان بە ئاوسی ھاوردە کراون لە وڵاتان و لە ھەرێمی کوردستان دەزێن و بۆ سەرەتای ساڵی داھاتوو بەرھەمی شیری ئەو پڕۆژەیە دەکەوێتە بازاڕەوە، ئێمەش وەکو حکوومەت ھەموو ئاسانکارییەکیان بۆ دەکەین، بۆ ئەوەی پڕۆژەکە سەرکەوتوو بێت و بتوانێت لەو رێگەیەوە خزمەت بکات، چونکە حکوومەتی ھەرێمی کوردستان بۆ بەرھەمی ناوخۆ پاڵپشتیی ھەموو پڕۆژەکان دەکات.
ناوبراو ئاماژەی بەوەش دا: لە ئێستادا ھەزار مانگا گەیشتوون و نووسراومان کردووە بۆ ھێنانی ٥٠٠ مانگای دیکەش و بەردەوام دەبین تاوەکو دەبنە ٣ ھەزار مانگا و پڕۆژەکەش کەوتووەتە بواری جێبەجێکردنەوە، چونکە مانگای ئاوس لە وڵاتانەوە ھاوردە دەکەن، ئەوانەی ئەورووپین و تایبەتن بە شیر و شیرێکی زۆر بەرھەم دێنن و لە ھەرێمی کوردستان دەزێن و دواتریش شیریان لێ وەردەگرن و دەکرێتە بەرھەمی شیرەمەنیی خۆماڵی بۆ ناوخۆی ھەرێمی کوردستان، چونکە ئامانجی حکوومەتی ھەرێمی کوردستان ئەوەیە، گرنگی بە بەرھەمی ناوخۆ بدرێت، بۆیە بە کردار ھەنگاوی باشی بۆ نراوە و بەردەوام پڕۆژەی تازە دەکرێنەوە، کە ئەم پڕۆژەیەش یەکێکە لە پڕۆژە ھەرە گرنگەکان.
ڕێدیر سدقی باسی لەوەش کرد: جگە لە گرنگیی پڕۆژەکە، بە سەدان ھەلی کار لەناو پڕۆژە و ئەوانەی لە دەرەوەی پڕۆژەش کار دەکەن، بۆ خەڵکی پارێزگای دھۆک دەڕەخسێت، چونکە پڕۆژەکە گەورەیە و لە ھەموو بوارەکان پێویستیان بە کرێکار ھەیە، بۆیە ئەو جۆرە پڕۆژانە زۆر گرنگن بۆ رەخساندنی ھەلی کار بۆ خەڵکی خۆمان.
بڵند ئیبراھیم