ھەولێر-KDP.info- سەرۆکی ھەرێمی کوردستان لە ھەولێر پێشوازی لە وەزیری ناوخۆی بەریتانیا کرد و باسیان لە ھاوکاریی ئەمنی و بەرەنگاربوونەوەی تاوانی ڕێکخراو، کۆچی نایاسایی، بازرگانی بە مرۆڤ، سپیکردنەوەی پارە و تاوانی ئەلیکترۆنی کرد.
ئێوارەی ئەمڕۆ چوارشەممە ٢٠٢٤/١١/٢٧ نێچیرڤان بارزانی، سەرۆکی ھەرێمی کوردستان، پێشوازیی لە خاتوو ئێڤێت کووپەر، وەزیری ناوخۆی بەریتانیا کرد.
لە کۆبوونەوەیەکدا پتەوکردنی پەیوەندییەکانی عێراق و ھەرێمی کوردستان لەگەڵ شانشینی یەکگرتوو، بەھێزکردنی ھاریکاریی ھاوبەش لە ھەموو بوارەکاندا، بەتایبەتی ھاوکاریی ئەمنی و بەرەنگاربوونەوەی تاوانی ڕێکخراو، کۆچی نایاسایی، بازرگانی بە مرۆڤ، سپیکردنەوەی پارە و تاوانی ئەلیکترۆنی، تاوتوێ کران.
سەرۆکی ھەرێمی کوردستان، گرنگیی بەھێزکردنی ھاوکاریی نێودەوڵەتی لە ڕووبەڕووبوونەوەی ئاڵنگارییە ئەمنی و مرۆییەکان و تاوانە نێودەوڵەتییەکان دووپات کردەوە و ستایشی ڕۆڵی شانشینی یەکگرتووی کرد لە پشتگیریکردنی سەقامگیریی ھەرێمی و پاڵپشتیکردنی ھەرێمی کوردستان لە پەرەپێدانی توانا ئەمنی و کارگێڕییەکانی.
لای خۆیەوە، خاتوو کووپەر، وێڕای پیرۆزبایی بۆ سەرکەوتنی ھەڵبژاردنی پەرلەمانی کوردستان، سوپاسی ڕۆڵی ھەرێمی کوردستانی کرد وەک ھاوبەشێکی ستراتیژی لە بەھێزکردنی ئاسایشی ھەرێمی و ئاماژەی بە بەردەوامیی پابەندیی وڵاتەکەی کرد بۆ پشتیوانی و ھاوکاری لەگەڵ ھەرێمی کوردستان و عێراق لەپێناو بەدیھێنانی سەقامگیری و ڕووبەڕووبوونەوەی قەیرانە مرۆییەکان لە ناوچەکەدا.
پرسی پێکھێنانی کابینەی نوێی حکوومەتی ھەرێمی کوردستان، گرنگیی جێیەجێکردنی دەستووری عێراق و چارەسەرکردنی کێشەکانی وڵات، مەترسییەکانی داعش، دوایین پێشھاتەکانی دۆخی ئاڵۆزی ڕۆژھەڵاتی ناوەڕاست و چەند پرسێکی دیکەی جێی بایەخی ھاوبەش، تەوەرێکی دیکەی کۆبوونەوەکە بوو.
