Hewlêr-KDP.info- Berpirsê Desteya Kargêrî ya Polîtîroya Partiya Demokrata Kurdistanê (PDK) Fazil Mîranî pêşwazî li şandeke Partiya Sosyalîst a Kurdistanê (PSK) bi serokatiya Bayram Bozyel û şanda pê re kir.
Di hevdîtinê de Fazil Mîranî Serokê Desteya Kargêrî ya Polîtîroya PDKê bi navê serkirdatiya siyasî ya Partiya Demokrata Kurdistanê (PDK) bi xêrhatina şanda mêhvan kir û balkişand li ser rewşa niha ya Kurdistanê bi taybetî û rewşa Iraq û navçeyê bi giştî û got ku rewş hestyar e.
Di hevdîtinê de Fazil Mîranî tekez kir ku jihevtêgihiştin û pevguhertina nerînan bi hev re, dê pirsgirêkan derbas bike û nakokiyan ji holê rake.
Mîranî herwiha bi kurtî behsa proseya helbijartinê ya şeşemîn dewra Parlamentoya Kurdistanê kir û ew hilbijartin bi serkeftî bi nav kir û tekez kir ku ev hilbijartin cihê şanaziyê ye ji bo gelê kurd li seranserî navçe û cîhanê.
Wî got jî, gelê Herêma Kurdistanê biryara xwe daye û divê êdî aliyên serketî dest bi avakirina hikûmeta Herêma Kurdistanê bikin.
Derbarê rewşa navçeyê de jî Mîranî tekez kir ku, navçe di rewşeke nebaş re derbas dibe û divê hemû alî bi berpirsyarî û bi jîrî ji bo parastina rewşa navçeyê tevbigerin û tekez kir, ku PDK li gel wê yekê ye ku pirsgirêka Kurd li Tirkiyê bi awayekî aştiyane û demokratîk were çareserkirin.
Mîranî peywendiyên di navbera Partiya Demokrata Kurdistanê (PDK) û PSKê de bi dîrokî û serkeftî wesif kir û hêvî xwest ku ev peywendiyên han ber bi pêş ve biçin û di xizmeta herdu aliyan de bin.
Ji aliyê xwe ve Serokê PSKê Bayram Bozyel bi navê xwe û şanda pê re spasiya serkirdayetiya siyasî ya PDK kir ku pêşwaziya wan kiriye û hêsankariya vê hevdîtinê kiriye. Herwiha pîrozbahiya serkeftina hilbijartina Parlamentoya Kurdistanê kir û tekezî li ser wê yekê kir ku Herêma Kurdistanê rûyekî şaristanî nîşanî cîhanê daye û ev yek jî ji bo her kurdekî li her cihekî cîhanê cihê dilxweşiyê ye.
Bayram Bozyel herwiha tekez kir, ku PSK alîgirê çareseriya aştiyane ya pirsgirêka Kurd li Tirkiyê ye û Partiya Sosyalîst a Kurdistanê (PSK) jî amade ye ji bo vê armancê çi pêwîst be bike. Hêvî jî kir ku Kurdistan li ser serkeftin û pêşketina xwe berdewam be.