Duhok-KDP.info- Serokê Partiya Paşerojê û Serokwezîrê Tirkiyê yê berê Ahmet Davutoglu tekez kir, “Lihevkirina Saykis-Pîkoyê gelên deverê parve kirine.” Ji bo bidestxistina aştiyê li deverê jî, pêdivî dibîne ku “Berê me li nirxên mirovatiyê be.”

Ahmet Davutoglu îro Îna 22.11.2024 di çarçoveya Korbenda Aştî û Ewlehiya Rojhilata Navîn (MEPS2024) de, ku li Zanîngeha Amerîkayî ya Kurdistanê li bajarê Dihokê tê lidarxistin, di panêlekê de beşdar bû û di destpêka gotara xwe de bi zimanê Kurdî kêfxweşiya xwe bi dîtina Serok Barzanî nîşan da û got ku Serok Barzanî dostekî nêzîkî min e.

Dautoglu ragihand, “Saykis-pîkoyê em hemî parve kirin, lê pirsyar ew e ka em çawa hev bigirin. Diviyabû dewleta Filistînê piştî şerê cîhanî yê duyê hatiba çêkirin, lê nehat çêkirin. Ev jî rih û rîşalên arêşeyên doza Filistînê ne. Herwesa çi pabendî di dema 67 salên borî de ji bo çarekirina qeyrana Filistînê nebûn.”

Davutoglu ron jî kir, “Îraqî piştî nemana Sedam mil bi milê hev rawestan, ev jî tiştek bû ku me dixwest bibînin.” Herwesa got, “Tevî ku Donald Trump dibêje ez dê şeran bidawî bînim, lê bi temaşekirina tîma wî ez gelek nîgeran im, ku kesên tund tê de hene.”

Serokwezîrê Tirkiyê yê berê ji bo bidestxistina aştiyê li deverê pêdivî dibîne ku “Berê me li nirxên mirovatiyê be, ne ku nirxên wekî Tirk û Ereb û Kurd. Ez nabêjim ku nabe em giringiyê bidin sinoran lê giring e ku Kurd û Tirkmen  Ereb di hatin û çûna sinoran de azad bin.”