ھەولێر -KDP.info- بەڕێوەبەری قەرزی بچووک لە وەزارەتی کاروباری کۆمەڵایەتی حکوومەتی ھەرێمی کوردستان دەڵێت، دوای بڕیاری سەرۆکی حکوومەت بۆ لێخۆشبوون لە ٢٠%ی قەرزی بچووک، ڕێنمایی دەردەکرێت و جێبەجێ دەکرێت.
ئارام ئەنوەر، بەڕێوەبەری قەرزی بچووک لە وەزارەتی کاروباری کۆمەڵایەتی حکوومەتی ھەرێمی کوردستان، بە ماڵپەڕی فەرمیی پارتی دیموکراتی کوردستانی ڕاگەیاند: دوای ئەوەی سەرۆکی حکوومەتی ھەرێمی کوردستان بڕیاری دا، بە لێخۆشبوون لە ٢٠%ی قەرزی بچووک، ئێستا چاوەڕێی وەزارەتی دارایی دەکەین ڕێنمایی دەربکات و بڕیارەکە بکەوێتە بواری جێبەجێکردنەوە.
ئارام ئەنوەر گوتیشی: چاوەڕێ دەکرێت لەم ڕۆژانە ڕێنماییەکەمان لە وەزارەتی دارایی حکوومەتی ھەرێمی کوردستانەوە بەدەست بگات، دواتر بڕیارەکە جێبەجێ دەکرێت و ئەو خەڵکەی قەرزی بچووکی لاماوە لێی سودمەند دەبێت، ئەمەش ھەنگاوێکی زۆر باشە و ھاوکار دەبێت بۆ ئەو خەڵکەی تا ئێستا قەرزی بچووکیان لایە ونەیانگەڕاندووەتەوە، بۆیە لەو بڕیارەی سەرۆکی حکوومەتی ھەرێمی کوردستان سودمەند دەبن.
لە ماوەی ڕابردوو سەرۆکی حکوومەتی ھەرێمی کوردستان کۆمەڵێک بڕیاری لەبارەی ئەو قەرزە جۆراوجۆرانەی حکوومەت دەرکرد کە لای خەڵکن، یەکێک لەوانە لێخۆشبوونی ٢٠%ی قەرزی بچووک بوو، بڕیارە لەم چەند ڕۆژە بەپێی ڕێنمایی تازە جێبەجێ بکرێت.
بڵند ئیبراھیم