ھەولێر-KDP.info- پارتی دیموکراتی کوردستان، لە ھەڵبژاردنی ٢٠ی ئۆکتۆبەر، سەرکەوتنێکی گەورەی تۆمارکردوو پلەی یەکەمی بەدەست ھێنا، سەرۆکی کۆمسیۆنی باڵای سەربەخۆی ھەڵبژاردن و ڕاپرسی لە ھەرێمی کوردستان دەڵێت: متمانەی خەڵکی کوردستان بە پارتی و خزمەتەکانی بۆ خەڵکی کوردستان بووەتە ھۆی زیادبوونی دەنگی پارتی، چونکە خەڵک متمانەی بە ھەر حزبێک ھەبێت دەنگی پێدەدات بۆ ئەوەی زیاتر خزمەتی بکات. 

ھەندرێن محەممەد ساڵح، سەرۆکی کۆمسیۆنی باڵای سەربەخۆی ھەڵبژاردن و ڕاپرسی لە ھەرێمی کوردستان، لە لێدوانێکیدا بە ماڵپەڕی فەرمیی پارتی دیموکراتی کوردستانی ڕاگەیاند: ھەر ھەڵبژاردنێک ئەزموونێکی نوێتر و زیاتر دەداتە پڕۆسەی دیموکراسی لە ھەرێمی کوردستان، ئێمە زۆر لەپێش عێراقەوە ھەڵبژاردنمان کردووە و ئەزموونێکی باشمان ھەیە، بۆیە پڕۆسەی ئەمجارەی ھەڵبژاردن زیاتر ھێز بە پڕۆسەکە دەدات، ئەمجارەش ڕێژەی بەشداریکردنی خەڵک لە ھەڵبژاردن زیاتر بوو، ئەمەش لەپێناو ئەوەی خزمەتی زیاتری خەڵکی کوردستان بکرێت، کە لە ماوەی ڕابردووش کراوە.

سەرۆکی کۆمسیۆن پێی وایە، سەرکەوتنی گەورەی ئەمجارەی پارتی دیموکراتی کوردستان لە ھەڵبژاردن، نیشانەی ئەوەیە حکوومەتی ھەرێمی کوردستان زۆر خزمەتی خەڵکی ھەرێمی کردووە، چونکە ھەر حزبێک چەند دەنگی زیاتر بێت ھێندە زیاتر لە خەڵک نزیک دەبێتەوە، لای خەڵکیش باوەڕپێکراوە و، خەڵک متمانەی بەو حزبە ھەیە.

ھەندرێن محەممەد باسی لەوەشکرد: ئەو دەنگدانە ئەرکی پارتی قورستر کرد، چونکە ئەو دەنگانە وەکو قەرزێکی خەڵکە لەسەر حزبەکان، لەبەر ئەوەی خەڵک متمانەی بەو حزبە ھەیە بۆیە دەنگی پێدەدات، چونکە دەزانن زیاتر خزمەتیان دەکات، بۆیە پێویستە چەند خزمەت کراوە لە کابینەی داھاتوو زیاتر خزمەت بکرێت.

پەیوەست بەو سەرکەوتنەی پارتیش، بڵند ئیسماعیل، بەرپرسی لقی دووی پارتی دیموکراتی کوردستان لە ھەولێر، لە میانەی ئاھەنگی سەرکەوتنی لیستی ١٩٠ی پارتی گوتی: ئەمجارە ئیسپاتمان کرد لەم ھەڵبژاردنە ھیچ شتێک لەبەردەم پارتی دیموکراتی کوردستان قورس نییە، پارتی دەتوانێت ھەرچەند دەنگی بیەوێت بەدەستی بێنێت، ئەمەش پێویستی بە پلانی ورد ھەیە، لە داھاتووش لە ھەڵبژاردنی پەرلەمانی عێراق زیاتر بەرەو پێشەوەی دەبەین و دەنگی زیاتر دێنین، چونکە پارتی ململانێی ھیچ حزبێک ناکات و لەو بازنەیە دەرچووە و نیو ملیۆن دەنگی لە حزبەکانی دیکە زیاترە، بۆیە با لایەنەکانی دیکە لەسەر دووەم و سێیەم بۆ خۆیان ململانێ بکەن، چونکە پارتی خەریکی کارکردنە بۆ خزمەتکردنی خەڵکی ھەرێمی کوردستان.

پارتی دیموکراتی کوردستان لە ھەڵبژاردنی خولی شەشەمی پەرلەمانی کوردستان ٨١٢ ھەزار و ٧٩٤ دەنگی بەدەست ھێناوە، بەراورد بە ڕابردوو ٢٣٣ ھەزار و ٥٥١ دەنگی زیاد کردووە، بۆ ئەم خولەی پەرلەمان لە کۆی ١٠٠ کورسی ٣٩ کورسی بەدەست ھێناوە، بە ڕێژەی نیو ملیۆن دەنگ لەپێش حزبی دووەمە.

بڵند ئیبراھیم