بەغدا -KDP.info- ئەندامێکی لیژنەی ئابووری لە پەرلەمانی عێراق ڕایگەیاند: پڕۆژەی ھەژماری من سەرکەوتنی گەورەی بەدەستھێناوە و بەردەوام لە فراوانبوون دایە، بانکی تازە و پرڕۆفیشناڵیش بەشداری تێدا دەکەن، ئەو بانکانەی ھەشن، ھەموویان لەلایەن خەزێنەی ئەمەریکا و بانکی ناوەندییەوە قبووڵ کراون.
سیپان عەزیز، بە ماڵپەڕی فەرمیی پارتی دیموکراتی کوردستانی ڕاگەیاند: پڕۆژەی ھەژماری من لە دوای ڕوونکردنەوەی دادگای فیدراڵی، یەکلای کردەوە کە پڕۆژەکە یاساییە و پرۆفیشناڵە، ئەوانەی دژایەتیی ئەو پڕۆژەیە دەکەن و پێیان وایە سەقەتە، خۆیان سەقەت و گەندەڵن و دەیانەوێت ڕێگایەک ھەبێت بۆ ئەوەی قاچاخچێتی و گەندەڵی بکەن، ماددەی ھۆشبەر بفرۆشن و تەمویلی تیرۆر بکەن و پارە بۆ گرووپی چەکداری نایاسایی ڕەوانە بکەن و دزی و گەندەڵی بەردەوام بێت، چونکە ئەگەر سیستمی مامەڵە لە ھەرێمی کوردستان ببێتە بانکی کە ھەژماری من خێراترین ڕێگایە بۆ مامەڵەی بانکی، دەرفەتی ئەو کارانەیان نامێنێت کە باسمان کردن، بۆیە گەندەڵکاران دژی دەوەستنەوە.
عەزیز گوتیشی: ھاتنی ئەو ھەموو بانکانە بۆ ناو پڕۆژەی ھەژماری من، وای کردووە سەرکەوتنی گەورە بەدەست بێنێت، ئەوانەش کە دژایەتیی دەکەن، ئەوانەن بەرگریی لە گەندەڵی دەکەن، ئینجا بەئەنقەست بێت یاخود بە نەزانی بێت، ئەو پڕۆژەیە بەردەوام لە فراوانبووندایە و بانکی زۆر پرۆفیشناڵی تێدایە کە ھیچ گرفتێکی یاساییان نییە و لەلایەن خەزێنەی ئەمەریکا و بانکی ناوەندیی عێڕاقەوە قبووڵ کراون.
دەشڵێ: ھەندێک پێوەر بۆ ھەڵسەنگاندنی بانک بە گشتی، لە پڕۆژەی (ھەژماری من)یشدا کۆمەڵێک پێوەر ھەنە، بەپێی ستانداردی نێودەوڵەتی ھەڵسەنگاندنیان بۆ دەکرێت ئاخۆ کامە بانک وەربگرێت و کامە وەرنەگرێت، بۆیە سەرکەوتنی گەورەی بەدەستھێناوە، ئەوانەی دژی پڕۆژەکەشن سەرکەوتوو نابن و شکست دەھێنن، گومانی تێدا نییە ئەو پڕۆژەیە تەواو دەبێت و دەکەوێتە خزمەت خەڵکی ھەرێمی کوردستان.
بڵند ئیبراھیم