ھەولێر-KDP.info- بەرپرسی لقی ١٠ی پارتی دیموکراتی کوردستان لە سۆران گوتی: ئەو بەڵێنانەی پارتی دیموکراتی کوردستان پێش ھەڵبژاردن بە خەڵکی داوە لە کابینەی ١٠یەمی حکوومەتی ھەرێمی کوردستان بەکردار جێبەجێی دەکات.
د.ڕێبوار بابکەیی، بەرپرسی لقی ١٠ی پارتی دیموکراتی کوردستان لە سۆران، بە ماڵپەڕی فەرمیی پارتی دیموکراتی کوردستانی ڕاگەیاند: گومان لەوەدانییە کە پارتی دیموکراتی کوردستان حزبی کردارە، ھۆکاری سەرکەوتنی بەردەوامی پارتی لە ھەڵبژاردنەکان، سەرۆک بارزانی یە کە فاکتەری بەھێز و سەرەکییە بۆ ھەموو سەرکەوتنەکان، بوونی ھەڵوێستی کوردانە و بوێرانەی پارتی لەسەر رێبازی بارزانی لە ھەموو ئان و ساتێک فاکتەرێکە دەبێتە هۆی ئەوەی خەڵک بە لێشاو دەنگ بە پارتی بدەن، فاکتەری کردارەکانی پارتی لە کابینەکانی حکوومەت و لە کابینەی نۆیەم لەسەردەستی مەسروور بارزانی سەرۆکی حکوومەتی ھەرێمی کوردستان ڕەنگی داوەتەوە، ئێمە وەکو پارتی ھیچ بەڵێنێک نادەین ئەگەر دیراسەمان نەکردبێت و ڕێوشوێنی جێبەجێکردنی دانەنرابێت، بۆیە ئەو بەڵێنانەی پارتی لە ھەڵبژاردنی ٢٠ی ئۆکتۆبەر بە خەڵکی خۆمانی دابوو بە دڵنیاییەوە لە کابینەی ١٠ جێبەجێ دەکرێت.
د. ڕێبوار بابکەیی گوتیشی: ئەگەر کێشەی تەکنیکی و نەخوێندنەوەی پەنجەمۆر و گرفتی دیکەی تەکنیکی نەبوایە بێ گومان ڕێژەی دەنگی پارتی لەم ھەڵبژاردنە دەگەیشتە یەک ملیۆن دەنگ، ھیوادارین لە ھەڵبژاردنی پەرلەمانی عێراق کۆمسیۆن کێشەکان چارە بکات، بۆ ئەوەی ئەو خەڵکەی دەچنە سەر سندووقی دەنگدان و دەنگ بە پارتی دەدەن بتوانن دەنگ بۆ پەرلەمانی عێراق بدەن و دەنگیان بەفیڕۆ نەچێت، بۆیە ئێمە لە سنووری لقی ١٠، ئەمجارە سەرکەوتنێکی مێژوویمان تۆمار کرد، ١٦ھەزار دەنگمان زیاد کرد بە بەراورد لەگەڵ ھەڵبژاردنی ڕابردوو، بە دەیان تەلەفۆنم لە ئەندام و لایەنگرانی خۆمانەوە بۆ دەهات، دەگریان دەیانگوت "چۆن نەتوانم دەنگ بە لیستی ١٩٠ی پارتی بدەم"، ئەو ڕۆحیەت و حەماسەتە یەکێکە لە ھێماکانی سەرکەوتن بۆ داھاتوو و ئاماژەی پێشوەخەته‌شە بۆ سەرکەوتن لە ھەڵبژاردنی پەرلەمانی عێراق دا.
بڵند ئیبراھیم