دکتۆر مەھدی ئەمین، پسپۆڕی پەیوەندییە نێودەوڵەتییەکان و مامۆستای بەشی زانستە ڕامیارییەکانی زانکۆی سۆران، لە لێدوانێکی تایبەتدا بۆ ماڵپەڕی فەرمیی پارتی دیموکراتی کوردستان، سەبارەت بە پێگەی ھەرێم و ڕۆڵی پارتی و دەستکەوتەکانی ھەڵبژاردنی خولی شەشەمی پەرلەمانی کوردستان، ڕایگەیاند: ئەو ھەڵبژاردنەی لە ھەرێمی کوردستان کرا بە بەشداریی کارای ھاووڵاتییان، کە ٧٢%ی دەنگدەر بەشدار بوون، سەرکەوتنێکی مەزن بوو بۆ دیموکراسیی ھەرێمی کوردستان، ھەڵبژاردنێکی شەفاف و بێ لایەن بوو بە پێی وتەی تەنانەت ئۆپۆزسیۆنیش کە پێش ھەڵبژاردن لەسەر بێلایەنی و بێگەردیی ھەڵبژاردنەکە پێداگر بوون و دەیانگوت "ئەمە کۆمسیۆنی عێڕاق بەڕێوەی دەبات و چاوی یوئێن و کۆمەڵگەی نێودەوڵەتی لەسەرە و پارتی ناتوانێ تێیدا سەرکەوێت، بەڵام دوای ھەڵبژاردن کە ئەنجامەکانیان بینی و سەرکەوتنی پارتییان بینی، ڕەتیان کردەوە بەڵام کۆمسیۆنی عێراق و کۆمەڵگەی نێودەوڵەتی ھەڵبژاردنەکەیان بە سەرکەوتوو و شەفاف پێناسە کرد.

دکتۆر مەھدی ھەروەھا گوتی: ئەو سەرکەوتنەی پارتی دیموکراتی کوردستان بەدەستی ھێناوە، لەسەر چەند بنەمایەکی گرینگ وەستاوە، یەکەم ئەوەیە ھاووڵاتییانی ھەرێم دیسان متمانەیان دایەوە بە پارتی دیموکراتی کوردستان و ئەو ڕاستییەیان دووپات کردەوە کە پارتی بەرگری لەم کیان و خەڵکە دەکات، لە ھەمان کاتدا ئەو ڕێژە زۆرەی دەنگی پارتی نامەیەکی ڕوون و ئاشکرا بوو بۆ ڕەقیب و نەیار و دوژمنانی پارتی کە سیاسەتی نامۆ و کاری نادروست و پڕوپاگەندەی ناڕەوای ئەوان دژی پارتی نەیتوانی باندۆر لەسەر پێگەی جەماوەریی پارتی و متمانەی ھاووڵاتییانی ھەرێم بەو پارتە کەم بکاتەوە، تەنانەت متمانەی ھاووڵاتییان بە پارتی زیاتر بوو.

دکتۆر مەھدی گوتیشی: ئەو دەرەنجامەی پارتی تێیدا ٨٠٩ ھەزار دەنگی ھێنا، کاریگەریی بەرچاوی دەبێت لە ناوخۆ و عێراق و ناوچەکەدا، ھەم لەسەر پێگەی پارتی و ھەم لەسەر حوکمڕانیی کوردستان و ئەوەی سەلماندەوە کە نوێنەری ڕاستەقینە و ڕەوای گەلی کوردستان پارتی دیموکراتی کوردستانە و ئەم پێگە جەماوەرییە وا دەکات پارتی لە مەوقعی ھێزەوە دانوستانەکانی بکات، لە ئاستی ناوخۆیی و عێراقی و لەسەر ئاستی دەرەکیش، بە تایبەتی لە ئەورووپا و ئەمەریکا نیشانی دەدات ھەرێمی کوردستان ناوچەیەکی دیموکراتی جێگیرە، لە کاتێکدا ناوچەکە بە ئاڵۆزی و ئاڵنگاریی زۆردا تێپەڕ دەبێت کە ئەمە دەستکەوتێکی گەورەیە و بەھا دیموکراتییەکانی ھەرێم و ڕێزگرتنی پارتی لەو بەھایانە ھاوتەریبە لەگەڵ بەھا دیموکراتییەکانی وڵاتانی پێشکەوتوو، ئەمەش بڕاندێکی جوانی کوردستانی پێشان دا بۆ ئەوەی لە ‌ڕووی سەرمایەگوزاریی دیموکراتییەوە وڵاتانی پێشکەوتوو پشتیوان و بەردەوام بن لە پشتگیریی ھەرێمی کوردستان و بە ناوچەیەکی پێشکەوتووی دژە تیرۆر و توندوتیژی بزانن لە ناوچەکە، ئەمەش دەستکەوتێکی تری ئەو ھەڵبژاردنە و ھێزی جەماوەریی پارتی نیشان دەدات.

ناوبراو ھەروەھا دەشڵێ: ھەموو ئەو ڕەھەندانەی باسمان کرد لە ڕووی دیموکراتی و مافی مرۆڤ و پێگەی جەماوەری و سەقامگیری ناوخۆیی، کاریگەری باشیان لەسەر ڕاکێشانی سەرمایەگوزاریی دەرەکی بۆ کوردستان دەبێت.

سەلاح جەلال