ھەولێر -KDP.info- ئەندامێکی مەکتەبی سیاسی پارتی دیموکراتی کوردستان گوتی: پارتی دیموکراتی کوردستان لەم ھەڵبژاردنەش دوو سێ ھێندەی لایەنەکانی دیکە کورسی دێنێت و کابینەی دەیەمیش بەسەرۆکایەتی مەسروور بارزانی پێکدێنێت، بۆیە داوا لە لایەنەکانی دیکە دەکەین ھێندە سنور نەبەزێنن دواتر ڕوویان ھەبێت بێنە لای پارتی بەشداری لە حکوومەت بکەن.
ھێمن ھەورامی، ئەندامی مەکتەبی سیاسی پارتی دیموکراتی کوردستان لە لێدوانێکی ڕۆژنامەوانیدا ڕایگەیاند: پێویست بوو لەساڵی ٢٠٢٢ ھەڵبژاردن ئەنجام بدرێت، بەڵام بەھۆی دۆخی خراپی یەکێتی نیشتمانی کوردستان و ھەشتی تەمموز و بە بیانووی گۆڕانکاری لە یاسای ھەڵبژاردن و پەنابردن بۆ دادگای فیدراڵی ھەڵبژاردن لە کاتی خۆی نەکرا، بۆیە ئەنجامدانی ھەڵبژاردن بۆ ھەرێمی کوردستان و پرۆسەی سیاسی گرینگە، بۆ پارتی دیموکراتی کوردستانیش بەھۆی ئەوەی ھێزی یەکەمە ھەمیشە خوازیاری سەرخستنی پرۆسەی سیاسییە گرینگترە و ھەموو ھەوڵێک دەدات بۆ ئەوەی ئەو ھەڵبژاردنە سەرکەوتووبێت.
ھێمن ھەورامی گوتیشی: تا ئێستا پرۆسەی بانگەشەی ھەڵبژاردن لە چوارچێوەی ڕێنماییەکانی کۆمسیۆنی ھەڵبژاردنەکانی عێراق بەڕێوە دەچێت، ھیوادارین ھەموو لایەنەکان پابەندی ڕێنماییەکان بن و پرۆسەکە لە کەشێکی ئارام بەڕێوە بچێت و تەعبیری لە ڕای لیستەکان و کاندیدەکانی خۆمان بکەین، پێمان وایە ئەوەی زمانی زبر بەکار دێنێ تەعبیر لە ئەخلاقی خۆی و پێکھاتە و ئێستا و ڕابردووی خۆیان دەکات، بەڵام پارتی دانابەزێت بۆ ئاستی سەرۆکی ئەو حزبانەی لە زمانی خۆیان دەبیستین، لەبەر ئەوەی پارتی دەیەوێت بانگەشە بە شێوەیەکی ھێمن و مەدەنیانە ئەنجام بدات، لەبەر ئەوەی پارتی لە ئارامی پێشدەکەوێت، چونکە ئێمە چاومان لە قۆناغی دوای ھەڵبژاردنیشە، دڵنیاین ھێزی براوەی یەکەمی ھەڵبژاردن دەبێت و پێکھێنەری سەرەکی کابینەی دەیەمی حکوومەتی ھەرێمی کوردستان بە سەرۆکایەتی مەسروور بارزانی دەبێت.
ھەورامی باسی لەوەش کرد: پەیامی ئێمە بۆ لایەنەکان ئەوەیە، ئەوەندە سنوور بپارێزن ڕوویان ھەبێت بێنەوە لای پارتی دیموکراتی کوردستان و داوا بکەن لە حکوومەت بەشدار بن، ئەوەندە تێبهێڵنەوە بۆ ئەوەی سەرۆک بارزانی و مەسروور بارزانی و پارتی بیانبوورن، ئەم ھەڵبژاردنە جیاوازە و ١٠٠ کورسی ھەیە، ٥ کورسی بۆ پێکھاتەکانە و کێبڕکێ لەسەر ٩٥ کورسییە، پارتی متمانەی بە خۆی و دەنگدەران ھەیە، بۆیە کورسی پارتی دوو ھێندە و سێ ھێندەی لایەنەکانی دیکە دەبێت.
بڵند ئیبراھیم